否極泰來呢四個字真係好靈，前日多蒙特作客贏奧地利維也納二比一，總算一洗近期頹風兼打開作客勝利門。但係呢次贏波代價都唔細，賽後增添艾度同埋戴迪兩件傷兵。「底」就反咗，不過怕且多蒙特暫時重要繼續響逆境中掙扎。
前日賽前，我求大俠提到多蒙特季初衰到貼地──歐冠盃出局之後，上個禮拜六聯賽又輸埋史特加，搞到球員都感愧疚，同意減薪兩成。好啦，隊波前日終於贏番場波，可惜艾度同埋戴迪傷咗，再加埋養緊傷嘅真高拿、羅斯基，想排強陣都難。禮拜六佢哋就主場對中游球隊弗賴堡……恐怕都難輕鬆取勝。
都係嗰句，有時西方人比我哋中國人更迷信。話說前巴西鋼門泰法路約好安玻里傾轉會，點知揸車途中架車故障，佢話係上天旨意叫佢唔好加盟安玻里，就係咁轉會告吹。泰法路自由身兼重有啲名氣，大不了去其他國家踢波，可憐安玻里就失晒預算。
拉素今季比賽不過一個多月，已經出現唔少傷兵，情況令人擔心。有評論就話佢哋今季換咗嗰位新隊醫手勢同腳頭都麻麻，加埋其中一位訓練員今季過檔皇家馬德里，影響到隊波喎。所以話，拉素咁辛苦留住班主力球員都唔夠，留唔住班無名英雄始終問題多多。
前晚曼城喺足協盃險勝洛格倫，認真牙煙，而英國傳媒對於國足猛將孫繼海彈多過讚，話佢防守上犯咗唔少錯誤，而佢同龍門施文亦配合得差。老孫下半場助攻兼博到十二碼，只能算將功補過。點到好，奉勸老孫識助攻之餘，都要先做好本份，要醒定啲啦。
前晚足協盃大吹冷門風，本來我求大俠都要喺頭場布力般身上「瀨嘢」，好在馬會個電話投注服務，因為當晚跑夜馬令到線路繁忙關係，要到十時五十分至重新接受足智彩投注，即係啱啱過咗布力般十時四十五分截飛嘅時間！我諗唔少電話投注客戶都因為咁而執番身彩囉！