富豪酒店執行董事范統噚日親自來電報料，話旗下嘅赤柱富豪海灣，開售短短六日賣出五座洋房，成績比預期理想。其中三座喺噚日促成，包括C五號屋，面積四千二百一十二呎，成交價三千五百三十八萬，呎價八千四百蚊；C六號屋面積同C五一樣，成交價三千五百萬，每呎八千三百一十蚊，最後D二十號屋，四千一百零四呎，造價三千三百九十八萬，呎價八千二百八十蚊。計埋之前兩間，呢個盤已套現兩億。
呢個豪盤，幾乎拖垮羅旭瑞成個王國，亦累埋中國海外，但現在樓市有多少氣氛，如果賣得一百幾十間，一天光晒，所以集團上下都搏盡。
范統重話，有間D七號董事屋，原本有買家出價七千五百萬洽購，發展商都準備收票，點知老闆羅旭瑞嘅友好又想買，為免順得哥情失嫂意，決定將個單位招標，截標日期未定。總之有得傾啦。另外，兩個全新示範單位即將面世，今次操刀嘅係太子女羅寶文，實行全家總動員。
𠵱家地產代理業幾乎已經由兩大陣營把持，不過，細行仍有生存空間，一啲單一市場嘅屋苑，好多時大行未必理會，大雞唔食細米嘛，行仔幾乎獨市。例如隔籬係新蒲崗工業區嘅居屋采頤花園，附近只有公路同公屋，舊年到期可以喺第二市場轉售，暫時未有大行染指，世紀21就把握機會，喺度開舖，今個月四單交易都由佢哋嘅Sunny包辦，唔使同其他行家爭崩頭，安安樂樂做topsale，真係爽。
現今日常生活已經同互聯網不可分割，唔少投資工具都透過互聯網運作，但係投資地產始終都要實地參觀過先落注，不過也有例外，中原商舖部近日就做緊一單利用電郵隔山買牛生意。
準買家係移民美國好多年嘅香港人，眼見大批熱錢湧入香港投資市場，心癢癢想投資吓香港舖位，利用電郵託中原搵回報有七厘嘅舖位。聽講單交易就嚟達成，蘭西諗，唔使實地睇舖就投資，名買家都好信中原喎。
鰂魚涌逸樺園開放示範單位以嚟，吸引唔少港島東區換樓客參觀，不過近排客源開始改變。根據美聯分析，外區例如西半山、跑馬地一帶嘅客源愈嚟愈多，比開放初期多咗四成，好似最貴重嘅一座頂層單位，買家正是跑馬地街坊，鐘意個單位悠閒寫意嘅氣氛，同埋寧靜環境，考慮自住。
另外，除外區客多咗外，同區租轉買個案都有增加，好似一名租緊康怡花園嘅日籍租客，最近以四百三十萬買咗間九百七十呎單位。個盤重未公開發售，已賣出一百二十個單位，平均呎價四千七百蚊，套現五億半，發展商考慮，下個禮拜公開發售中、低層單位。
荃灣愉景新城商場，搞購物推廣，送出嘅獎品認真重手，消費者有機會贏到一百萬商場購物禮券，名額兩個。不過，聽講話每日都有參加限額。
喺指定日子消費滿二百五十蚊單一發票計，就可以進入旋風密室，用十秒鐘攞喺空中飄揚嘅禮物券，用嚟換禮品；最精采嘅環節，就係開啟有六位數字嘅「兩百萬金庫」密碼，若成功破解，就可以攞到一百萬購物禮券，到時真係買嘢都買到手軟嘞。
市道稍為轉好，發展商乘機加價。話說有名外籍客睇中九龍區某個一手豪宅，個單位原本賣一千零九十萬，噚日攞住本票去落定，發展商臨場反價，重加成一百一十萬，做中間人嘅代理幾經交涉後，結果加多九十萬成交，即一千一百八十萬，比原定價錢高八個巴仙。唔單只二手業主反價勁，發展商都好狼。
蘭西
電郵地址：