今個星期真係擺明玩懷舊，先有GC隻翻炒作《天外魔境Ⅱ》打頭陣，重要街價都係賣$240至$260，連埋特典DVD真係幾抵玩。聽聞係兩間大批發鬥價先至咁平出街，尤其近排日圓好似坐火箭咁升，下批貨起價都唔出奇，有興趣好趁早入手喇。
SEGAAGE就有戰斧同太空哈利（SpaceHarrier），街價賣$160至$170左右，兩隻Game雖然畫面靚咗，但係可玩性就真係麻麻，買嚟儲都OK嘅。至於上集評價同樣麻麻嘅《英雄潭》，亦有新作見街，賣$380至$390左右，重有剛推出嘅《網球王子2》又係擺明搶Fans錢，上個月先來一隻運動版，今次就Minigame加育成，重有一隻喺十月尾推出。咁搞法，鐵人就算係漫畫嘅Fans，都搞到冇乜興趣喇。
如果閣下有玩過第一集嘅《侍》，相信印象會幾深，新一集如過往好人、壞人都可以自由揀，重加入強化咗武器系統同多重結局，值得期待，行貨10月9號推出。
文：打機鐵人