兩年前放棄簽約無綫而投靠劉德華的林家棟，雖然人氣不及當年，但他揚言自離巢後，人工比以前賺多三倍，故不介意做華仔身邊的綠葉。林家棟說：「《無間道》嘅配角唔係個個做到㗎！」
無綫小生近年大執位，林家棟、羅嘉良、吳啟華及黃日華等孭飛小生先後離巢，但重返娘家的亦有陶大宇、陳錦鴻、譚耀文及張家輝等。而林家棟自從離開無綫後，簽約劉德華旗下的天幕公司，論人氣雖然不及從前，但家棟揚言投身大銀幕除了學到新事物外，賺錢也比以前多三倍。
家棟在無綫時期是一線小生，但離巢後他在《愛君如夢》及《無間道》兩片中，卻變成老闆華仔身邊的綠葉，對此他毫不介意。日前家棟在銅鑼灣接受訪問時笑說：「《無間道》嘅配角都唔係個個做到㗎，咁多影帝喺度，自己有得做已經幸運啦，我唔介意企喺華仔身邊，港姐出嚟都要傍住六叔啦，唔通又要介意？我都想坐喺六叔隔籬，不過佢唔畀我坐，要畀港姐坐之嘛。」
華仔與家棟稱得上是亦師亦友，華仔曾贈他一句座右銘：「一個artist（藝人）行出嚟就要ready（準備）好。」家棟一直銘記於心，他說：「佢本身都係咁，出嚟一見人就ready好，佢勤力，親力親為，佢從來都唔會擺副老闆格，大家都係喺無綫出嚟，喺呢行亦做咗唔少日子，好多嘢都盡在不言中。」
對於眾小生「歸位」，家棟說：「可能佢哋喺出面跑得辛苦，返TVB會舒服啲啦，TVB收入穩定，亦都會清楚嚟緊有乜工作，有啲人唔想周圍跑，TVB會係一個可以唞吓氣嘅休息地方。」無綫一哥羅嘉良選擇投奔大銀幕，對此家棟說：「呢個係電視演員嘅終極理想，大家都唔想成世留喺度，做咗若干年之後，都會想出去跑吓，嘉良出去係正常嘅。」
在芸芸小生當中，他看好哪位可接棒做一哥？家棟說：「我覺得最緊要係個角色可唔可以深入民心，唔係一唔一哥，一哥係邵逸夫，出糧嗰個咪一哥囉！但我覺得新啲嘅小生中，鄭嘉穎幾好，佢掂呀，陳豪有觀眾緣，戲路變化比較大。」
無綫花旦不時傳出勾心鬥角，家棟坦言曾遇上某小生搞小圈子，聯同一些演員玩杯葛，令他甚為難受，他說：「佢玩小圈子，講流言，嗰陣我都有啲無助，唔通你逐個人走去解釋咩？只會愈描愈黑，佢唔好玩呢啲，大家齊心做好個戲重好啦，我冇為呢個人勞氣，自己冷靜面對問題，用技術性擊倒佢，結果拍完呢套戲時，個個演員都同我敬酒，因為佢哋終於明白一啲事，而佢𠵱家又點呢？唔好搵啲對手做挑戰對象啦。」
