大市噚日走勢成個倒轉V字形，不過都創出今個升浪兩個新高，分別係日中新高（11444）同成交新高（213.5億元），中段恒指曾一度上升149點，收市11286，倒跌9點，照睇走勢就成個單日轉向格局，不過，熱錢𠵱家先大舉入市，個市急升後只會調整，未來兩三個禮拜仍可看好，一波睇恒指可見12000，特別睇好幾隻大藍籌，包括滙豐（005）、新地（016）、和黃（013）同中移動（941），噚日推介名單重加入國企電力股，華能（902）同北京大唐（991）預期都有1成上升空間。
大市反覆，藍籌榮辱互見，大行買盤主要落在太A（019）、中銀香港（2388）同港交所（388）身上。太A曾升上46.9元，後跟大市回軟到46.4元收，仍有0.6元進帳；中銀收11.25元，升0.55元；港交所高收16.5元，升2.8%，冇回過，個勢最強。上個月，芬佬來料已經叫買中銀，揸到呢兩日先發力，噚日叫買太A，話好快會見5字頭。
至於國企，佢哋有盤買山東國電（1071），睇下幾時又發力。
位元堂（897）噚日復牌，收1.8仙，升12.5%，據中資消息，位元堂有一單大Project，已傾到八八九九，相信下個月可落實。早輪位元堂股價曾見5.8仙，家下得番3成，已係低吸良機，呢隻股票特性係波幅大，為穩陣計，定下止蝕位揸中線，有機會好快賺一個開。
位元堂兩個大股東合共持有逾58%股權，最近玩具大王蔡志明入股，持有8.58%，加上基金持股亦唔少，街外流通貨量實在有限，若有利好消息，不難再現月初的急升場面。
位元堂近期受惠自由行，旗下的保健產品銷路上升，日後將會與蔡志明加強合作，透過蔡氏在美國的健康產品分銷公司（擁有7800個銷售點），拓展美國市場。
至於珮夫人止咳露，已成功打開內地市場，現時有約15000個銷售點，並繼續高速擴張，將會為集團帶來可觀的盈利貢獻。
位元堂在內地已建立口碑，未來1年將增設4家分店，其中1家設於上海，主要售賣名貴藥材及高級健康食品，方便當地人自用和送禮。
郭兆誠