港股反覆，由升149點變做跌9點埋單，但即月期指高水擴大到65點，下周一結算，得兩日時間，咁樣高水法可能代表個市欲罷不能。10月期指高水57點，實際唔止此數，因為長和10月除息，亦意味個市向好。
是日焦點，喺中銀（2388），最高11.65元，收11.25元，仍有進帳55仙。本周一推介隻冷門中銀Call輪9031，4日內升58%。中銀咁升，滙豐（005）要繼續望多兩眼，佢嘅成交量有睇頭，周二成7.3球，周三10.9球，昨日15.4球。美國金融股急升，中銀又升，將可吸引更多芬佬炒滙豐。滙豐Call輪9845昨日推介，收97仙，升6仙，未有跟貼正股。正股收105元，升1元。結果9845有負溢價0.3%，槓桿率仍然係11倍左右。呢件已經冇晒溢價，真係啖啖肉，正股起1元，隻輪跟貼應該起10仙，除咗呢件博得過之外，隻9908亦係啱炒。
滙豐升1元，9908升得1仙，收70仙。隻輪唔係啲有粒星嘅另類輪，冇理由跟正股跟得咁少。明年1月到期，溢價1.9%，槓桿率15倍。重有4個月壽命，計落每個月溢價0.5%，抵玩。
華創（291）跌15仙，Call輪9721跌11仙，收69仙，下月底到期，溢價0.5%，槓桿率12.2倍，炒得過。正股上番月9.05元，隻輪值1.25元。
章盛