九月二十二日星期一中午，路經大道中華人行，只見人山人海，都唔知為乜嘢事。此地乃政黨捐錢嘅地方，經常有劉慧卿、楊森、何俊仁、李卓人等人企響度對住「大聲公」猛咁嗌，嗌到聲嘶力竭，請路人捐錢。有啲人誤會點解來來去去都係見到劉楊何李等人，唔通佢哋霸住晒華人行外圍？非也，自由黨乃富貴黨，港進聯、民建聯亦大把錢，使乜企街求捐款喎，只有啲窮鬼政黨先至要周街勸捐啫。
但星期一企街之人，原來係募捐「反對填海」嘅法律費用，中環人大概好多都反對填海，逼入人群擺錢入捐款箱嘅，多到數唔晒，非常擠逼，秘書C為咗香港風水，反對填海，亦想捐一張紅底，但佢逼唔到入人堆，又驚碰撞，惟有作罷。佢話：「捐錢之踴躍程度，恨死劉慧卿，如果呢班人企足三日街，一定可以籌夠錢同政府打填海官司。」
諗深一層，點解咁多中環上班一族爭住捐錢以示反對填海呢？孫明揚局長素來足智多謀，應該知道當中玄機啩？左丁山亦反對填海，當日行唔到埋去，有機會肯定會捐埋一份。徐嘉慎律師係反填海先鋒，佢喺九月二十二日《信報》發表嘅陳年舊詩NightoverVictoriaHarbour十分有誠意，對維港感情非常豐富，為維港美景而不惜與政府打官司之人，好值得我哋支持啫。