愛美係女人嘅天性，周梁淑怡、梁劉柔芬同劉健儀三個自由黨核心女將，噚日臨離開北京之前，最後衝刺去買衫。
三美約埋一齊去名店多多嘅北京賽特商場shopping，不出兩個鐘，就你一袋、我一袋返去王府飯店同陳佐洱食飯。劉健儀買咗鮮紅色乾濕褸、鐵銹色高領中褸，再加一件米色短褸，劉健儀話鮮紅色嗰件係兩位黨友要佢買，改吓佢平日深深沉沉嘅形象咁話。
周太之後帶咗兩位女士去同仁堂買感冒沖劑，真係識貨，八方老友前排喺北京唔多舒服，飲咗兩包沖劑就好番。不過周太係香港零售界代表，做乜唔留港消費？佢話自己只係去了解行情同價格喎。
（圖）自由黨三女俠（左起）劉健儀、周梁淑怡同梁劉柔芬，噚日喺北京shopping，個個都有收穫。 本報記者北京傳真
傳真︰2623-9278
電郵︰