大市噚日咁升法，實在令人興奮，至於係長升長有定係短暫轉勢，小初就唔理得咁多，反正小初以短炒為主，只會順勢行事，唔會諗得咁長遠。
可能係多芬佬留意港股，所以呢排好多上市公司都流行搞路演，相約歐美基金經理見面，介紹一吓自己間公司有幾正。
經紀黃話，好似老虎仔隻遠東發展（035），以及嘉華國際（173）和嘉華建材（027）不約而同一齊搞路演，其中以遠展最先有反應，在噚日大升市中，勁升12.5%，收1.17元，成交金額亦急增至4442萬元。
雖然遠展股價勁升，但仍未升回月初嘅批股價1.20元，還望老虎仔今次遠行，落多兩錢肉緊。
至於嘉華系股價則未見異動，雖然嘉國久唔久都炒吓注入賭場業務嘅憧憬，但現時升至1.10元水平，開始有多少阻力，反而唔及信德（242）咁好炒，雖然信德家陣已經升到2.90元，但一直捧開場嘅一間美資大行，稍後又會幫信德推介，股價分分鐘高處未算高。
慕容小初