王書麒同許秋怡噚日喺洲際酒店筵開三十五席舉行婚宴，噚日朝早未夠八點一班姊妹團同戥穿石就集齊喺酒店接新娘。佢哋兩個喺圈中一向人緣唔錯，向海嵐、楊思琦、趙學而、吳家樂、蔡一傑同李永豪都係兄弟姊妹團嘅一分子，而安德尊就反串做大妗姐。
一班姊妹梗係唔放過玩新郎呢個大好機會，其中有個環節要新郎哥問人攞簽名同恭賀語句，吳家樂就叫大妗姐安德尊畀支筆佢，安德尊話冇準備到，吳家樂居然喺老友嘅大喜日子爆咗句：「×街啦你！」書麒最後以九千九百九十九蚊開門利是過關。
呢對新人雖然連仔都生埋，但係開門接新娘一刻，兩個都感動到眼濕濕，不過最搞笑都係佢哋兩個重未得閒去註冊，而且連個仔嘅名都未改，搞到過晒期要俾人罰錢。秋怡又因為產後肥到戒指都戴唔到，好彩有書麒送嗰條價值三十幾萬嘅家傳之寶鑽石鏈墜撐住。
至於喺嘉賓名單中最矚目嘅賓客都應該係萬梓良，佢重坐喺主家席㖭，而楊思琦同李永豪呢對就成日俾人玩話下次輪到佢哋。
吳美珩同謝君豪噚日喺跑馬地街頭拍攝無綫新劇《彩虹橋》，自從有報道話吳美珩已經秘密結婚之後，所有記者想搵佢回應佢都唔覆，噚日佢見到記者探班都好愕然，總之就左閃右避兼答非所問，咁啱楊婉儀個老公返屋企經過見到佢，笑晒口落車同佢握手，唔知係咪恭喜佢新婚之喜，搞到吳美珩個樣鬼咁尷尬！
噚日報道講話喺成龍拉攏下，曾志偉同楊受成終於一戲泯恩仇。聽講成龍曾經做中間人勸志偉放低之前啲唔開心嘢，重叫佢客串拍楊受成有份投資嘅《新警察故事》。志偉噚日終於承認成龍搵過佢拍戲，佢話：「成龍係提過，當時我話有期就拍，不過呢幾個月我都冇期。」問志偉究竟知唔知部戲楊受成有份，志偉就好巧妙咁話：「乜嘢呀？我都冇期。」
李玟向來形象冶豔，佢大前日去咗遼寧瀋陽巿，為一個演唱會做嘉賓。李玟喺內地一向都有啲fans，為咗報答佢哋嘅支持，李玟當日就着咗件低胸衫，騷吓佢超勁嘅身材畀fans睇吓。
見到李玟着到咁索，內地觀眾嘅反應梗係鬼死咁熱情啦，尤其係啲男觀眾，全部都俾性感嘅李玟俘虜晒！
