第五代福士Golf贏盡車迷歡心

有車壇長青樹之稱嘅福士Golf，第五代型號終在剛舉行過嘅法蘭克福車展上現身；擁有多項新配搭嘅新車，惹來不少車迷注目，據聞新車重有望於明年初抵港㖭！不如𠵱家一齊嚟先睹為快，睇睇部車有何吸引力啦！

年輕造型吸引度高
原有福士Golf嘅造型，都係走較為成熟穩重嘅路線，但呢款屬第五代嘅新車，卻帶有一份年輕活力感，車身線條變得圓渾唔在講，就連車身剛度亦較前有所提升，從而為乘客提供更高嘅保護度呢！

全新車廂布局惹人愛
除外觀有改動之餘，新車就連車廂布局亦經過重新設計，務求予人耳目一新之感；當中最惹人注目會係中控台設計，不但有齊高級音響及原廠冷氣外，其他設備嘅控制鍵亦見鋪排得簡潔有序，使用方便容易；與此同時，由於車身尺碼有所增加，因而令車廂空間較前變得闊落，就連尾廂嘅容量亦有所增多㗎！

勝在引擎配搭多
推出初期，廠方將會為新車安排有1.4公升（75匹）及1.6公升FSI（115匹）電油引擎供選擇，隨後會增添1.4公升FSI（90匹）及2.0公升FSI（150匹）型號，以滿足不同用家需要；另外，由於底盤剛度較前增加，響出色嘅懸掛組合輔助下，行車循迹性明顯提升不少。