尖沙嘴真係豪客集中地，不時都聽到原本只係行街購物嘅人士，轉過頭就去咗買豪宅。香港置業啱啱就喺海港城商場，撈到一對美國遊客，介紹佢哋買咗尖沙嘴擎天半島一期，三座高層H室九百九十八方呎單位，成交價四百一十萬。
香港置業高級區域經理馮智賢講，公司同事喺商場見到呢對夫婦一身貴氣，於是上前游說佢哋參觀擎天嘅示範單位，跟住好快就決定買樓。原來呢對買家，喺美國開科技公司，好鍾意中國文化，每年都會嚟香港旅行幾次，所以索性買個住宅當度假屋。呢個客喺美國住六千呎大屋。
另外，美聯分行經理黃少明話，將軍澳維景灣畔一名日籍租客，因租期差唔多滿，有見供平過租，所以用二百四十萬，買咗屋苑十二座中層七百一十四方呎單位。佢細佬第二日到訪，順便睇示範單位，問完喺東京嘅家人後，就用二百二十萬，買咗十五座中層六百八十方呎單位，實行兩姊弟住埋同屋苑，互相照應。
9月份上海嘅樓市同香港一樣咁暢旺，龍頭地產代理金豐‧鴻運嘅生意額重破晒紀錄㖭，聽行政總裁田國強講，截至二十號，金豐‧鴻運喺上海嘅生意額已直迫十億元，其中有六億來自淮海路非常熱賣嘅商場舖位，上個禮拜五吸引六百人通宵排隊搶購，單日賣出近四百四十個舖位，佔總數九成。
至於成立銷售點唔夠一年嘅香港，本月份嘅生意額只係上海嘅十分之一，即係一億左右。
中國幅員廣闊，除普通話外重有唔少「鄉下話」，下個禮拜十．一黃金周，將會有好多來自唔同省分嘅內地人嚟香港，利嘉閣就派出五名能操不同中國方言嘅員工，駐守青衣藍澄灣售樓處。
呢幾名代理噚日重即場示範講普通話、褔建話、圍頭話、上海話同客家話，介紹樓盤位置、環境、設計，同提供嘅服務。買家去到異地，遇到識講自己話嘅人，打破語言隔膜，倍感親切，買樓時話唔定會更爽手！
標榜擁有無敵遊艇會海景嘅鴨脷洲深灣軒，享有先天地利，發展商自然就地取材，送買家遊艇會會籍。唔單止咁，市務總監林寶彤重話，呢個盤同其他中細價盤唔同，有明確嘅市場定位，就係新派豪宅，明顯迎合新一代追求居住質素嘅客群。
為令傳媒親身感受擁有遊艇會會籍嘅樂趣，噚日新地專程帶傳媒由香港仔遊艇會出發，乘船到淺水灣對開嘅熨波洲，喺清涼海風下舉行記者會，新地重話，深灣軒嘅海景達國際級水準，媲美澳洲嘅達令港同三藩市嘅梭塞里多。係咪真係咁國際級就見仁見智，不過，難得遊艇會提供消閒設施畀住客用，都幾吸引。
由地產建設商會支持成立嘅香港環保建築協會，從97年開始推行嘅建築環境評估法以來，唔經唔覺已經有八十五幢樓被評分，或做緊評核，樓面計有成五百五十萬方呎，共二萬一千個住宅單位，其中住宅有二十一幢。
聽商界環保協會陳志強講，到目前為止，只有四個住宅項目可以攞到「優秀」級別。𠵱家評核緊嘅，有置地西環綠意居，同恒基西灣河碼頭項目。
香港環保建築協會秘書長譚安德話，由於香港市區物業都係以高密度發展，加上人口密度高，所以喺全世界評估此類建築上，成為重要指標。
蘭西
電郵地址：
