潮女玩煮飯仔南瓜薄餅𠱁家人

女人學煮原因多多，可以為冧男友、減肥、慳錢等等，剛脫離學生生涯不久的Cody，學煮原來全為家人。每次出街一定勁食甜品，回家就有樣學樣跟住整，靠一手精美甜品，把家人𠱁得開開心心。今次試用南瓜做薄餅，只用5蚊，就令到屋企人大讚好味。

記者：羅惠芬　攝影：伍慶泉

外形成個Wet妹的Cody，想不到原來最黐家，有空就玩煮飯仔。父母皆屬潮州人關係，自小已被灌輸「女人一定要識煮飯」的觀念，所以Cody10歲已經識煮餸，更在當年焗出人生第一個雞蛋蛋糕，得到不少人稱讚！

下廚建立家庭樂
Cody愛煮，只因每次下廚，不但可以一家人聚首一堂，更可以得到家人讚賞。幾個月前她第一次弄Tiramisu，全家十幾人輪流品評，笑料亦不斷爆發，就連一向嚴肅的爸爸，也作「美味如人間罕見美食」般狀，令她開心不已。每次Cody重看錄影帶，都笑得人仰馬翻。正因每次弄甜點，都離不開跟家人的快樂時光，她的夢想就是開間時裝連Cafe店，全家人一起打理，自己就專責弄甜品。

經濟又有營
閒時最愛研究新甜品的Cody，早前在一間雲南餐廳吃飯，嘗到一個南瓜燒餅，一試傾心之下，回家決定自己動手做。「其實這個甜品好易整，而且所費極低，又好有營養，出街食真正唔抵。」最重要是她試整一次就成功，滿足到不得了。