前日沽空港元炒家被大挾倉後，噚日輪到期指淡友被大挾淡倉，雖然大摩出晒口術唱淡地產股，重話已沽清地產股，但市場力量竟以地產股作主力托高期指，大大力咁摑咗大摩一巴。唔知大摩係咪輸咗好多錢？不過阿虎係唔會同情淡友。恒指勁升351點，收報11295，成交198億元。
實收數碼通（315）11億元股息嘅新地（016），股價噚日勁升8.5%，收報63.75元，成交達到19億元。
Cookie話，此股早前急升時，曾被美資大手造淡，所以噚日成為重點補倉股。最妙嘅係，新地市值啱啱高過長實（001），達1531億元，成為第五大恒指成份股，亦係最大市值嘅地產股。
據e莉莎話，超人一向都唔鍾意被新地市值騎在長實之上，如果超人要採取行動扭轉呢個局面，只有兩個做法，一係托高長實股價3%，或者壓低新地股價3%。現時市場資金充裕，又冇乜利淡消息（就算有暫時都無人會理），所以托高長實就比壓低新地容易。
大市勁升，二三線股亦禾雀亂飛，其中軟庫發展（648）勁升26.4%至0.177元。此股早前炒上0.30元水平後，一直有大戶出貨，令股價受壓，而和黃（013）行使可換股債券，增持股權至24%的消息曝光後，亦出現趁好消息沽貨，股價一度跌至0.138元水平。
家陣大市氣氛好轉，炒家又用和黃增持嘅消息嚟炒軟庫，憧憬和黃會取代日本軟庫成為大股東。
阿 虎