港股大發神威，又創下今個升浪3個新高紀錄，包括單日新高（11298）、收市新高（11295）同成交新高（198億元）。恒指收市大升351點，重上10日（11004）同20日（10993）線，重遠遠拋離，今次升市，起碼可以玩多兩個禮拜，恒指可向11600至11800的區域推進，完成埋「最後一升」，先會展開中期調整。
大市升勢咁勁，地產股功勞最大，最突出係新地（016），搶到上65元後回收63.75元，仍大升5元，升幅8.5%。數碼通（315）派特別息，新地淨袋成10億元，市場預期佢今日宣布年度業績時會有好派送，噚日買盤佔咗9成都係大冧巴，成交總值19億元，高踞第一位，華寶睇好地產股，新地嘅目標價係73.5元，𠵱家上車，重有15%嘅上升水位。
藍籌行先，跟住就會由二線股接力，彩星集團（635）已彈出，高收1.54元，升8仙，雖然花旗係咁沽，但中銀同荷銀係咁接，多多益善，睇情況基金重未買夠，佢哋早前已經拍心口話彩星可見2字頭，到呢個水位重買得咁積極，果然信心十足。
另一隻要留意嘅係海域集團（1220），噚日高收1.66元，升8仙，成交大增到863萬股（上日僅為158萬股），消息就話有基金上車，其實以海域嘅條件而論，股價真係有力翻一番。
海域呢輪頻頻做騷，先後去過日本、新加坡同台灣，月底重會去歐洲，初步反應幾好，有基金急不及待，已在市場收貨，看來好戲快將上演。
海域剛宣布中期，由於要為投資項目撥備，半年盈利下跌8%至7952萬元，但公司業績實質有良好進展，營業額10.8億元，大增77.2%，不計非經常性項目前溢利為9684萬元，升34%。集團財況健全，6月底的流動資產淨值6億元，其中5.09億元為現金及現金等值項目，每股已值1.27元。
03年度（12月年結），估計盈利1.78億元（下半年再無減值），每股盈利0.45元，預測PE僅為3.7倍，派息0.1元，息率6厘。
海域近期在今年2月中的高位水平整固，噚日破位而上，且有大成交支持，以大圓底形態衡量，起碼可見2.0元。
郭兆誠