四位來自美國及韓國的嶺大交流生，自問對香港地道小食情有獨鍾，「掃街搵食」是課餘一大活動。今日他們就來一次美韓大比拼，挑戰不少香港人也吃不消的地道小食，一展他們對臭味及色素的抵抗能力。跟着又見他們深入街市，在小食檔前，操鬼聲鬼氣的廣東話：「唔該，我要……」
撰文、攝影︰劉智仁
逢星期一、三至五出版
美國隊
Royce（右二）
年齡：21 主修：InternationalRelationsYear4
最愛零食：薯片、朱古力、各式糖果
搵食經驗：去旺角搵小食，好似玩尋寶遊戲咁，好得意！
Jacob（右一）
年齡：19 主修：PhilosophyYear3
最愛零食：「豬扒」（原來畀同學整蠱）
搵食經驗：試過喺美國連續食足五晚零食，結果發現肥咗七磅，好得人驚！
韓國隊
黃桂媛（左一）
年齡：21
主修：SocialSciences&PoliticsYear3
最愛零食：韓國嘅長形魚蛋
搵食經驗：韓國冬天氣溫非常低，所以見到街邊有冒煙嘅地方，就知道一定有好嘢食。
Jamie（左二）
年齡：21 主修：Advertising&PublicRelationsYear3
最愛零食：煎釀三寶（在韓國雜誌上見過，未落飛機已經好想食）
搵食經驗：我去過旺角一帶試街頭小食，估唔到世界各地嘅美食都可以喺香港食到，如果可以嘅話，我一定會根據雜誌的介紹，逐間店舖品嘗。
美韓兩隊參賽者都自問對香港小食已經稍有認識，咁當然就要讓他們試試其中極品，臭豆腐、豬粉腸都未嘗過，又怎算認識地道小食？我們就準備了四種食物，讓他們挑選試食。
唔好意思，Jacob竟然揀中了臭豆腐，一打開紙袋，一陣「臭」氣隨之而來，Jacob馬上化身「快閃黨」黨員，一轉身就即閃。「乜咁臭都可以係食物？」對住件臭豆腐，無奈地經過三分鐘心理掙扎，終於，都冇法擺入口，「嘩，呢種味道，令我諗起廁所嘅嘢，點食？」
Royce見八爪魚仔的外觀討好，細細隻，幾可愛，都完全冇問顏色點解咁搶就一於揀佢！諗都唔諗就一啖塞入口，一副食物焚化爐本色！試完一隻，竟然唔停得口。
桂媛選中了香港經典的內臟小食︰豬粉腸。她看着手上一堆攣曲物體，即時一臉不明所以：「乜嚟㗎？」當記者告訴她這是豬腸時，她大吃一驚︰「腸冇理由係橙色！好離奇，不過入口好彈牙，口感唔錯。」
Jamie試食的是魷魚，大家別以為好「筍」，因為魷魚表面，塗上了香港掃街精至愛嘅「秘製辣醬」，等住睇佢眼淚鼻水直流的震撼樣！估唔到Jamie的反應是︰「好美味！香辣味加上魷魚嘅鮮味，簡直係完美。」原來Jamie是辣得之人，這考驗對她來說沒有難度。
四位參賽者熱身之後，另一場小食大比拼即將展開——出街搵食！目的地：街市小食檔。只見佢哋邊行邊講「有限」的廣東話作為練習，還討論要吃甚麼小食，果然是名副其實的「為食鬼」。
■比試地點揀中呢間：屯門富泰村街市的熟食店
一到埗，他們已經看準了一間熟食店，就擁上前挑選小食。老闆娘非常好人，除了用客家版英文跟交流生交談外，還答應作為今次廣東話大比拼的評判。美國隊一開始就好識做，稱呼老闆娘為「靚女」，她笑得見牙唔見眼。Royce非常好學，每當老闆娘介紹小食名稱，他都會用記事簿寫上拼音。兩位美國男孩不斷用唔鹹唔淡的廣東話問老闆娘︰「幾多錢？」「好食？」似乎對小食名稱並不太認識，一味手指指！
跟住到韓國隊出戰，兩位靚女有備而戰，對小食名稱的廣東話發音有一定程度的掌握，Jamie一開口就話︰「唔該燒賣！」老闆娘立即大讚：「Good，Verygood﹗」。聽聽老闆娘評語，「我認為美國嘅男仔比較健談，但講到發音就及唔上韓國姑娘，所以我畀韓國隊兩個『叻』，而美國隊就一個『叻』啦﹗」一句講晒，韓國隊勝！
