本欄開檔以來，收過無數咁多讀者來函以及電郵，有讚左丁山嘅，有痛罵嘅，有指點迷津嘅，有詢問若干事情嘅，有時左丁山會在此公開回覆，亦有唔少私底下用電郵回答，但大部份都係睇完就心領嘞，不能一一盡錄。
不過最近收到兩封來函，內容大同小異，心裏有啲感動，忍唔住要講吓。其一係一位女士A三年幾前為乖女在加州讀書，來信問一啲事，左丁山都唔記得當時有冇答到，但女士A今次來函話：「個女今年已經喺UCB畢業，多謝以前指點。」謹此恭喜女士A，你個女在家境並不富裕嘅環境下，堅持奮鬥，完成學業，成績好好㖭，好大原因係有個關心佢嘅媽咪，誓為後盾，完全唔關左丁山事嘅。
另一位女士B來函話：「三年前小兒考入大學，講及一位韓國教授嘅英語好難聽，而報紙上亦睇到其他家長投訴同樣問題。但你在專欄話：大學生將來在社會工作，會遇到各種不同人等，不是每個人都能說標準口音的英語，就當是磨練吧。我將你的話跟兒子說，到了今年畢業，他找到工作，原因就是公司波士是韓國人，面試時，他認為我的兒子在芸芸眾多應徵者之中，跟他的溝通最好！」
女士B寄埋多謝卡嚟，愧不敢當。左丁山講嘅只係常識，大學教授來自五湖四海，個個講英語、普通話嘅口音都唔多一樣，上佢哋嘅課，係磨練自己聽覺嘅絕好機會。現在一啲大學生選科唔鍾意聽老師講國語，何其短視也。女士B位公子肯上堂聽韓國式英語，畢業後立即有回報，實在係好啱聽。