先兩日個市朦朦朧朧，前日有啲嘢睇，昨日忽然爆炸性上升，恒指大漲351點，破咗本月9日11242高位，重差5點就係11300，而期指則高水46點。淡友俾好友挾倉挾到頭破血流。
地產股氣勢勁爆，好多大行轉口風，睇好地產股，認為地產股見底，近日樓盤好銷，亦帶起地產股。
地產股Call輪，好幾隻單日升幅超過4成，除非贏開錢，否則唔係好多人夠膽追貨。
期指就快結算，睇嚟揸重貨期指大戶，會趁勢挾多一挾，最好用嘅工具，乃係滙豐（005），其次係中移動（941）。滙豐Call輪唔係升得太多，買落去風險相對較細，最佳主角係9845，昨日升得7仙，收91收，隻輪12月到期，溢價只係0.1%，槓桿率11.4倍。昨日滙豐升1.5元，落後大市，更加有機會後來居上，隻輪咁嘅數據，更加抵買。
滙豐喺隻輪到期之前，升6元，到110元，9845有權升60仙，升幅超過6成。
博中移動成為挾倉工具，揀中移動Call輪短炒，9861最啱。
和黃（013）升2.25元，收58.70元，個勢未盡，短炒Call輪，揀9914，明年1月到期，溢價3.8%，槓桿率9.8倍，數據唔錯。
章 盛