鬍鬚孫唔知係咪五行之中，條命同個「土」字相沖，俾阿董嘅「八萬五」玩完，又因填海問題，正面同全港民意紮馬。佢擒日見傳媒，數落保護海港協會主席徐嘉慎一番，又話政府有好多「苦衷」，原來喺一九九四年底，英方向中英聯合聯絡小組應承，移交添馬艦嗰陣，重包埋填番直條海岸線共三百米，畀解放軍可以停得到戰艦咁話。
阿董棚人一孭親鑊，就慣咗推畀前朝。「八萬五」又話係前朝訂落嘅建屋目標，「母語教學」又話係肥彭拍板，𠵱家填海，又關前朝港英事，重拉埋解放軍落水，話填海係為咗解放軍，將中央軍委會推上前台，挑起香港人對解放軍嘅不滿，阿董喺七一之後，學人玩政治，有咗少少進步，不過咁樣拉阿爺落水，又好易會玩出火。
成十年前嘅陳年往事，已成歷史。連國家都要講與時俱進，解放軍近年放洋留學嘅好多，都有好多人識得環保，鬍鬚孫將解放軍擺上枱，即係暗示解放軍好僵化，中央軍委唔肯講道理，矛頭直指解放軍最高話事人江主席，係咪有少少過份？
七一紅咗個梁家傑，填海風波又湧現中產新星徐嘉慎，阿董四面樹敵，真係有一鋪癮。
十年前，老鄧未死，嗰陣時話香港要派七八千解放軍，但今時今日，據知情者話，解放軍軍營一早就靜靜雞裁員，因為局勢安全，香港人示威遊行好文明，已經冇乜必要駐七八千解放軍咁多，聽講實際上得番二三千，或者更少。香港已經唔係顛覆基地，解放軍毋須咁多，美國戰艦埋親岸，又唔係侵略，屬於友誼拜訪，美國水兵上岸去灣仔搵蘇絲黃，十年前嘅藍圖，阿董棚人重當係聖旨，有個咁聽話嘅人做特首，又點怪得國家係都唔肯換人。
講到動亂，美國駐港總領事祈俊文喺祖家話：七一遊行，同美國無關，冇涉及所謂外國勢力，無形中即是摑咗民建聯佢哋一巴。
中央早年自己起家，就靠蘇聯外國勢力嘅扶植啫，孫中山推翻滿清，都要靠日本仔幫忙。可能百幾年來嘅歷史慣咗係咁，所以有親反政府嘅活動，梗係慣性咁話係外國勢力扶持嘅。個細路仔已經大個咗啦，大是大非，自己識判斷，敢怒敢抗爭，唔使人教，戒咗奶，兼唔使個菲傭扶住佢行路啦，好心啲土共，唔好以為今日嘅香港，係中華蘇維埃政權時代嘅中國吖。
傳真︰2623-9278
電郵︰