自由黨訪京，受注目嘅除咗惹火嘅田少外，重有剛剛入行會嘅周梁淑怡。周太認真風塵僕僕，之前跟咗煲呔曾去花旗國推銷香港，前日開始就由三藩市搭十七個鐘飛機返香港，喺香港等兩粒鐘，再飛四粒鐘去北京。
八方冇講錯，香港飛京城平日只要三個鐘，但係因為北京暴風雨有雷公劈，周太架機要喺天空盤旋多一粒鐘，計埋落機後塞車，佢足足磨咗廿四小時先去到京畿重地，最慘佢原先諗住返酒店執靚個樣先蒲面，焗住要臨時取消，好彩佢平日勤護膚，花容除咗有啲憔悴，大致都冇乜點失色，只係一去到酒樓同黨員會合，就餓到見乜食乜，少咗兩分淑女儀態咁啫。
而田少就乜都靠晒楊孝華，唔理去邊度食飯，幾點鐘見乜人，都話要問Howard，何解？田少話因為Howard做旅遊，一切佢打點喎。
（圖）周太經過一番折騰後，落機時個樣明顯殘過平時。本報記者北京傳真
傳真︰2623-9278
電郵︰