大學近年揼心口揼得愈嚟愈發茅，大學校長為咗籌多啲錢，真係各出奇謀。香港大學每年一度嘅校友賽馬日喺本周六舉行，以往淨係得一個「香港大學校友會挑戰盃」，但今年大學特登問馬會借埋其他九場賽事個名嚟用，各院校或宿舍只要向校友籌夠十萬蚊，就可以命名其中一場賽事，話咁易就籌咗成百萬。嗰日頭場馬叫做「法律學院校友賽」，尾場就叫做「港大教研發展基金賽」，場場都同港大有關。
港大校長徐立之同事喺籌錢方面，姿勢又似乎狼咗啲，佢哋希望當日賽馬贏到錢嘅校友，最好捐埋啲luckymoney畀母校。港大今次玩出位，好多教授反應都異常雀躍，因為佢哋平日掛住教書，唔少都未踏足過馬場。不過大學教授，平時閂埋門打吓麻雀，炒吓股票，或者打吓老婆，冇乜人見到，公開現身馬場，揸住本馬經圈圈吓，又係肉酸少少。
傳真︰2623-9278
電郵︰