以前香港足球博彩未規範化（即係賭波）之前，成日聽到啲人講甚麼上盤下盤，由於自己睇波非常感情化，完全唔理性，所以完全唔熱衷於賭波，因為據講都係下盤着數，但自己鍾意親嘅都係上盤，鍾意上盤但係要為下盤打氣，呢種行為非常之心理變態，接受唔到。
自從賭波規範化之後，馬會將波盤賠率簡化，強隊賠少啲，弱隊賠多啲，例如皇馬對弱隊，皇馬勝出的話，買十蚊大約有三蚊回報，睇落好似比投注喺跑馬嘅大熱門位置好，果然皇馬又連贏幾場，朋友都話有些少斬獲，夠請飲茶有突，反而有點擔心馬會會唔會好易被煲爆。前幾日的曼聯與亞仙奴大戰，曼聯成為大熱門，亞仙奴如果勝出的話會有三倍回報，立即打開報紙做功課，亞仙奴之前大敗於國際米蘭，知恥近乎勇，應該會落力表現重拾信心；蘇金寶因家事未能出賽，隊友齊聲話會為蘇奮力一戰；教頭雲格過幾日又生日，試問有乜生日禮物好得過打贏宿敵曼聯？根據以上種種數據，決定瞓身成副身家買兩嚿水亞仙奴，今次重唔發達？
結果係悶戰一場，雲尼絲達羅冇咗碧咸供應嘅靚波，好似儍佬咁一味喺前場走嚟走去，C.朗拿度一味識插花，睇嚟費爵爺今次貪靚仔入錯貨；亞仙奴重衰，成班球員以打和為己任，悶得很。成副身家二百大元進貢馬會，心痛到瞓唔着，重新證明賭錢都係制唔過，唯一得着係應該唔使為馬會擔心，只要一日有我呢亭盲毛，馬會唔會咁易被煲得爆。