噚日，理工大學舉行李兆基基金捐贈儀式可說是「星光熠熠」，除了飛俠哥頓胡應湘，地產界巨子李兆基、鄭裕彤都出現，原因係政府新的大學撥款計劃內規定，大學可以籌到幾多錢，政府就撥幾多錢，於是各大院校各出奇謀，理大就搵咗李兆基捐成四千二百五十萬元，換言之，加埋政府嗰份，理大未來一年就有八千五百萬元教學經費。
不過，校長潘宗光重嫌唔夠，現場再向李兆基揼心口，話希望「四哥」（潘校長對李兆基的暱稱）加碼二百五十萬元，咁加埋政府一份，就可以湊夠九千萬元，「長長久久，有無窮無盡嘅意思」。咁都講得通，八方覺得潘校長唔做校長大可去做sales。
四叔（外界對李兆基的尊稱）當然冇托手踭，連台下的彤叔鄭裕彤都話支持，佢重搭嘴話，四叔賣樓都加咗價，捐款加碼都應該。四叔雖然被潘校長揼心口，但佢老人家昨日好開心，大合照時右手拖住彤叔，左手重搭住哥頓大脾，左右逢源。
（圖）四叔（前排中）右手拖住彤叔，左手重搭住哥頓大髀，鬼咁開心。 李潤芳攝
傳真︰2623-9278
電郵︰