前晚馮仁昭喺銅鑼灣Benz車行門口，撞見關心妍（Jade）同女助手喺度睇車，但因為車行收咗舖，所以就真係得個睇字，見佢不時對住部過百萬嘅平治開篷跑車手指指，重睇到眼都唔眨，好似好有興趣咁。睇完就去附近嘅一間生果舖買水晶梨，然後又走過隔籬間雪糕屋排隊買雪糕。
馮仁昭知道阿Jade之前獲萬事得贊助一部M2車仔，但贊助期屆滿就冇車揸啦，近排有人發現佢出咗部平治房車，其實部車係佢媽咪嘅，阿Jade只係有時借嚟揸下啫。
阿Jade嘅唱片銷量一向唔錯，照計佢分紅都應該有唔少，但平日佢係慳妹一名，所以到𠵱家重係冇車階級。阿Jade噚日就話架Benz跑係佢嘅dreamcar，不過佢覺得太貴啦，要等明年喺紅館開埋處女演唱會，賺埋歌酬至夠錢買車，唔怪得佢要望梅止渴啦。不過馮仁昭就睇唔出佢平日斯斯文文，原來竟然鍾意啲咁辣嘅車，確係人不可貌相。
方力申噚日出席某牌子嘅奇異果宣傳活動，佢已經係第二年做奇異果代言人，廣告商近兩年不時將成箱奇異果送去佢屋企，有時佢都食唔到咁多，方力申話：「鄧健泓話我都食唔晒，不如送啲畀佢家人食，咁我都覺得冇所謂，咪送咗兩箱畀佢囉！」聽聞鄧健泓亦畀咗一箱佢女友原子鏸，實行分甘同味。
麥包噚日喺將軍澳電視廣播城錄影無綫節目《橫掃千金》，佢提起近期想換車嘅事就好火滾，原因係啲保險公司對所有藝人收嘅保費特別貴，佢認為對一啲守法嘅藝人唔公平，重話政府對保險業監管不力，麥包𠵱家諗住聯同一班藝人寫信去平等機會委員會投訴，其實唔只藝人保費貴，啲保險公司𠵱家見投保人係記者都要收貴啲，真係幾唔公平！
蕭正楠噚日喺西貢拍攝一個奶凍食品廣告，佢由朝拍到晚，成日就要不停咁做住個食品名「
曾寶儀噚日喺港台接受節目《娛樂滿天星》訪問，佢將會擔任有線娛樂新聞台嘅主播，佢話香港嘅娛樂新聞同台灣嘅好唔同，問佢會唔會請爸爸曾志偉做嘉賓，佢笑話：「我唔敢講太多佢嘅嘢，不過等我建立咗一個專業形象，到時先訪問資深藝人曾志偉啦！」至於會唔會同君如合作就未知，但佢原來好驚君如㗎，可能係前輩關係由細睇到佢大。
譚小環同陶傑即將會一齊主持無綫節目《香港熱鬧》，馮仁昭噚日喺將軍澳電視廣播城見到佢哋，小環就大讚陶傑係一個好有吸引力嘅才子，重話可惜佢結咗婚，但仍然會等，馮仁昭估唔到佢咁開放，問佢等邊個？小環即刻補飛話等陶傑個仔，陶傑聽到就話：「結咗婚咪重方便。」唔知呢啲係咪人稱嘅風流才子呢？
林建明噚日喺旺角金龍船酒家出席「茁壯行動」支票移交儀式。佢話佢個英文名以後會由Meg改為Victoria，因為自從碧咸上次嚟香港嘅時候，大姐明見到佢時大叫自己係Victoria，碧咸就即刻回頭對住佢甜笑，所以自此就叫自己做Victoria，而佢老公曾展章就俾啲朋友改咗個不雅花名做「必含」。
