十‧一國慶黃金周向來都係內地人出外旅遊嘅旺季，今年加上「自由行」，本港各地產代理把握時機，迅速向呢班潛在買家招手，送黃金、手提電話、酒店住宿、飲食優惠等置業優惠。
市場預期，十月一日至七日期間，將有大批內地旅客來港，美聯、中原及香港置業，各自炮製黃金周置業優惠。美聯向每名持中國護照，又透過佢哋購入物業嘅內地買家，送贈黃金一両，名額三十個。另同餐飲聯業協會合作，送飲食優惠畀所有睇樓人士，最高折扣為五成，約有一千間商舖參加計劃，主要係食肆。
中原就搞大抽獎，所有內地客嚟港經佢哋參觀一手住宅物業，即可以參加，獎品係千足純金幣一枚，名額有三個，買入單位嘅內地客，更加可以獲得千足金屋擺設一座，或四日三夜五星級酒店住宿。
至於香港置業，會送出五十部手提電話，喺黃金周入市嘅內地人士，都有機會得到。
蘭西去過唔少招商推廣活動，間唔中收到啲紀念品，但以噚日武漢王家墩商務區招商會送屈原嘅《離騷》迷你版竹簡最有文化，用激光將字刻喺竹片上，送埋放大鏡，包你實睇到。
王家墩商務區前身係軍用機場，武漢市政府計劃發展為中央商務區（CBD），預留一幅約二平方公里嘅土地做香港園，邀請香港地產商，包括新世界發展同嘉里等大財團參與開發。
發展商好多時都會諗計促銷樓盤，形式有好多種，好似新世界同信和等五個發展商嘅何文田君頤峰，早前搞咗個競猜寶盒密碼遊戲，㩒中者可奪得價值二十五萬蚊嘅卡地亞頸飾。
可惜，個遊戲喺指定時限內冇人估中，結果噚日由何伍燕榆揭曉該六個密碼。聽發展商講，過去一個月有過萬人次嘗試解碼。
雖然獎品送唔出，但唔使灰心，因為發展商話諗緊，下一次促銷活動會送相同價值嘅獎品。
近排熱賣嘅豪宅薄扶林貝沙灣二期，吸引唔少名媛商賈去參觀。女藝人陳曼娜同前亞姐樂蓓，噚日下晝就去咗睇示範單位，唔知係咪見到鄭明明頻頻入市，買何文田君頤峰再買貝沙灣，搞到兩位都蠢蠢欲動呢？
喺紅磡揸住唔少物業嘅陳曼娜，向來投資買樓甚有心得，今次睇中貝沙灣都唔出奇。樂蓓舊年底已四出睇樓，曾去過尖沙嘴擎天半島。
講番貝沙灣，噚日成咗間第七座五十二樓相連戶，三千二百五十七呎，一千七百五十三萬賣出，成五千三百八十二蚊呎。
本港發展商呢期興將啲樓盤攞去內地做路演同展銷，上海幾乎成為必到之地，發展商不約而同都搵金豐‧鴻運幫手。
第一個搵佢哋嘅係長實，展銷畢架山一號。之後就係嘉華地產，九龍塘嘉皇臺同何文田嘉多利豪園，會喺十‧一黃金周期間做推介。恒基今日就公布委託金豐‧鴻運，喺上海為旗下香港豪宅盤做路演。
呢幾個發展商喺上海都有投資，重要搵幫手，睇嚟都係因為金豐‧鴻運係當地嘅地產代理龍頭行，所謂猛虎不及地頭蟲也。
蘭西
電郵地址：
