唐唐帶挈香港「屍爬」搞活經濟，睇嚟唔係講笑。阿董民望突然「大幅度急升」百分之零點五，突破唔及格嘅四十五分防線。港元跟住又堅挺至九七年十月以來嘅最強點。
八方問特首辦對於阿董嘅優秀民望點睇，特首辦話：上次已經講過嘞，董生係唔會因此自滿，重會繼續反思㖭。見到阿董一副留班學生面壁思過咁嘅姿態，就算係假都應該加兩分演技同情分，又令人點樣鬧得落口吖。
上次長毛去荃灣衝擊阿董巡區，搞到阿董親民受阻，接唔到請願信。擒日就唔同嘞，長毛唔喺度，行會復會，阿董放完假返工，喺總部門口接信接番夠本，一接就二百幾封，好英勇咁挫敗咗長毛上次衝擊嘅圖謀，可以講係贏番晒成條街。
跟住阿董重停步，同啲請願者面對面講咗成十分鐘嘢。今次重奇迹，居然冇人兜口兜面掟阿董雞蛋、吐口水或講粗口喎，係咪好值得阿董今晚買番個大蛋糕同A1一齊慶祝吓咁千載難逢嘅氣氛呢？
不過阿董嘅十分鐘對話，請願人士嘅心聲，佢聽入幾多，就真係冇人考究得到。連啲政經人士都話，經常同阿董閉門講三個鐘頭嘢，畀意見，阿董一味哦哦哦，最後講一聲「不過，我都重係認為」點點點，請願人士嗰十分鐘對話，春宵一刻值幾多金，就真係冇人知嘞。
港元嗰方面，市場人士分析，唔好太早開心住。因為美國佬喺度迫緊人民幣升值，布殊唔趁勢發狼厲，攞唔到選票，出年大選，民主黨亦會兩邊一齊夾。人民幣一升值，出口即刻下滑，香港嗰啲有廠喺珠江三角洲廠商，呢一輪