銀河映像（8130）自從控股權易手，由九叔位公子入主後，股價就一路升唔停，噚日又升51.3%，收0.088元，而且唔係乾升，成交有成716萬元，實在令人心動。加上同樣係搞電影嘅寰宇國際（1046）在錄得一宗大手成交後，股價急升，當堂令小初對電影股大感興趣。
不過經紀陳就向小初潑冷水，佢話小初如果想吼銀河同寰宇，倒不如睇實先排大家都賺過錢嘅中國星（326），皆因隻股可能高處未算高。
雖然銀河新老闆財力毋須懷疑，但畢竟隻股係創業板公司，加上啱啱易手，暫時唔慌有古仔講。至於寰宇，早排2供1供股集資，供股價0.08元，集資3830萬元。寰宇供股反應唔錯，獲得超額認購，雖然有人已經沽出計數，但唔排除重有大戶揸重貨。噚日寰宇升11.8%，收0.152元。
中國星亦在上月，以每股1元配股，集資2760萬元，如無意外，呢批新股會喺今個星期出籠，由於批貨落在相熟嘅強者手上，所以稍後唔排除有炒作。
慕容小初