若然大家有留意開車壇動向，都應該知道萬事得新一代Mazda3（即原有323）車系，經已正式面世。據亞Mark打探所知，香港代理快者可望於今年11月正式開售，率先抵港分別會有四門及五門掀背版，既有標準裝備之餘，代理重會準備有原廠SportKit供用家選購；兩者均以一台1.5公升DOHC偈作主打，並附以最新4前速半自動波箱，而車價則會在港幣13萬上落。據有接觸過部全新Mazda3、並作過實地測試嘅知情人士透露，新車用上歐式底盤結構，明顯有更強穩妥感及操控力，加上車身外形屬SportCar設計，四門版酷似同廠Mazda6嘅縮水版，而五門掀背版卻帶有點意大利愛快跑車嘅神韻呢！響一眾同級日本車中，兩者均較熱賣嘅豐田Corolla同本田Civic要更具號召力。若然各位想知道第一手詳細測試報告的話，就記緊要留意我哋下月底嘅Mazda3海外實地試車報道喇！