連跌3日後，恒指噚日幾乎上番萬一點水平，最高報10998，收市10944，升71點，期指回升之勢更急，收10970，升127點，變番高水26點，市場氣氛並未如一般人想像咁差，好友會否使出誘敵深入招數，睇多兩日便知道。
大市升後調整，好正常，家吓大行同基金都確認牛市已出現，調整之後，個市重有排升，佢哋對後市睇得好樂觀，最新嘅預測係：美林將恒指上升目標調升到12800，UBS則調高到13000。早前芬佬對國企有保留，但噚日態度有變，話調整或會告段落，可以短炒一轉。
國企反彈，鋼鐵股個勢最急，呢輪一直有大盤沽住嘅馬鋼（323），沽盤一收，立即反彈10個位，升幅7%，鞍鋼（347）同重鋼（1053）亦分別有5.4%同4.6%進帳。不過，今次國企係反彈，唔會係新升浪，彈完之後，點都要調整多一次。
Tom.com（8001）噚日早盤重做緊2.4元，突然間見Citigroup撲出來連掃兩檔，食咗幾百萬股後，股價就湧咗上去，結果收2.5元，升0.1元，聽聞大動作好快出台，3字頭係保守估計。
呢輪做「披成」嘅股份，只要係質高態勇嘅，大部份都畀基金食晒，冠捷（903）同中聯系統（757）亦唔例外，特別係前者，披成嘅銀碼成7億多，但真正出街嘅都冇10%，基金「擸」咗呢手貨，第日肯定會砌上去，食大茶飯。
冠捷早一輪易主，大股東潘方仁出售26%股權予京東方，每股作價2.95元，套現10.5億元。上周四，潘方仁再以每股作價3.555元，出售2.15億股，套現7.6億元；家吓京東方已成為最大股東（持26.36%），公眾人士持股上升至62.02%，呢度起碼有三分二係落在基金手中，基金股成份好重。
03年度（12月年結）上半年，冠捷盈利3010萬美元，上升12%，營業額8.03億美元，升12.8%，每股盈利2.2美仙，中期息0.31美仙。由於控制成本得宜，液晶顯示器毛利率持續改善，由02年第4季4.6%，提升到今年第2季的5.9%，而第3季定單更較上季增加50%，估計全年盈利可上升至7000萬美元，每股盈利0.4港元，以基金股PE最保守的12倍計，股價已可見4.8元。
郭兆誠