正所謂光陰有限，要活得精采就冇可能等放假先約Friend去玩，但係平平時放工，約得人食飯嚟又冇時間行街，行得街嚟又冇時間扮靚，扮得靚嚟又去唔到修養內涵，做邊樣先好真係人生交叉點！今次就介紹幾間有得食有得玩重有得Shopping扮靚靚嘅餐店畀你，一次過滿足你4個願望，重等？行住睇啦！
記者：馬慶武、陳慧敏 攝影：陳智良、楊錦文、陳陶鈞
Model：Holly、Cathy、Jenny、阿琪、Holy、Yoko、Vivian(SunSpot)
逢星期一至四出版
三年時間，一家四口齊心打拼出嚟嘅滇園雲南飲食已經喺荃灣開咗三間分店，昆明新店年頭先開張，滇園二太子Melvin嘅最新目標已經飛咗去中山。而呢間分店就以菌類火鍋做主打，成間店除咗火鍋外，新菜譜今個星期剛啱推出，8成食物都係用新鮮雲南特種菇菌同植物做成，啱晒𠵱家「健康飲食」大晒嘅潮流。
為咗推廣雲南文化，滇園更加同同鄉《香港民族文化促進交流會》合作，喺舖頭一角搞埋雲南工藝班，大家可以喺舖頭報名，學習紮染、蠟染、整繡花鞋、手繩製作等小數民族工藝。導師李小姐就係呢個會嘅主席。Melvin話：「我哋知道香港人最鍾意就係食，但淨係推廣食就唔係全面嘅文化推廣，所以我哋同李小姐合作，可以多元化啲！」
腳穿自己手作繡花鞋嘅會長李樂眉係正宗雲南人，真名稍苞烏奴，基本上喺香港見到啲咩雲南小數民族展覽活動都係出於她手。「我𠵱家都有去小學教小朋友紮染同蠟染，等佢哋早啲認識我國少數民族。因為啲工具全部都係雲南獨有，所以班小朋友見到都好興奮㗎！」
滇園這家專做火鍋的分店，來自雲南的奇珍異菌近30種，松茸($48)、黃蘿傘菌($22)、北風菌($18)、老人頭($28)等好比菌類大展，當然又會隨季節左換右換。
咁恐怖？其實係雲南其中一種特有樹皮至真（樣衰衰真係似十足青蛙皮），醃製過之後口感過癮，脆脆哋咁，食到最後有少少澀，風味獨特。
凡惠顧滿$100就送的南瓜餅真係睇佢唔出，純南瓜肉只係加咗啲麵粉搓成，南瓜味異常清甜兼唔油膩，又軟又煙韌嘅口感似食年糕但又唔滯喎，千祈千祈千祈唔可以錯過！
地址：荃灣荃華街16號創意無限商場38-39號
電話：24083138
營業時間：12:00nn-11:30pm
香港民族文化促進交流會
有飯食、有嘢賣嘅上樓餐廳及Cafe愈來愈多，望見都已經驚喜全無。而於中環新張嘅木馬會，除咗有新潮香薰菜外，重有各種專業講座、興趣班或者周末活動貼滿報告版；《星期六有心人》每次環繞不同主題，等大家開開心心高談闊論一番；推開「會議室」暗門，居然重有晚裝任擇化妝品任選；餐廳中間重有個閃亮化妝間，畀各位OL放工後變身索女繼續周圍蒲！
至於啲菜式，就係幾位老闆嘅創意之作，重款款都好意思㖭！
午市套餐包一款主菜、一道甜品及每日餐湯，附香濃咖啡或香草茶一杯。
挪亞方舟實質是條「運肉船」，以鮮茄子挖空成船形，將豬牛肉混為一體（似免治豬牛）；厚厚的茄子加上大堆肉碎，口感充實。
莧菜及雞蛋味蜆殼粉內藏沙甸魚肉，再鋪上芝士同焗，份量輕盈，OL食完重有位食甜品，幾好！
Yoko：呢度環境好舒服，唔似某啲樓上Cafe咁好有壓迫感。食物OK，個挪亞方舟，肉同茄子撞埋口感好得意。最緊要係Kate玩得又好傾，令人好Relax。我哋識咗唔夠半個鐘已經玩到好癲喇！
地址：中環皇后大道中54-56號豐樂行一樓
電話：31023211 入會費用：$50/永久
營業時間：星期一至四：10:00am-11:00pm
星期五及六：10:00am-12:00pm
私人派對：至2:00am
LEface開業初期，老闆Vera發現有唔少OL趁午膳時間嚟做Facial，所以當時都已經有提供三文治之類嘅食物畀佢哋做完Facial醫埋肚，用一粒鐘左右就可以又靚又飽咁返公司。「後來同啲客傾開，原來好多客都因為放工約咗朋友食飯，覺得嚟做Facial好趕。所以我就決定做埋私房菜，等啲客可以同啲朋友約埋一齊嚟做Facial、按摩，之後慢慢食埋飯至走。」Vera話長時間都有數位美容師駐場，所以5、6個人一齊嚟做Facial都可以應付得到。
嚟得做美容護理嘅，都定必係貪靚鬼，有啲除咗做Facial之外重會做減肥纖體療程，所以LEface供應嘅食物都會以輕量為主，大多數都係用海鮮、蔬菜等高纖維食物做材料，而且只會使用橄欖油，一定唔會加味精，保證健康。遇到嚟減肥嘅客人，Vera更會親自安排特別餐單，配合佢嘅減肥計劃。Vera更話如果客人唔想即刻喺度食，帶埋食物盒嚟攞走返屋企或者返公司都一樣咁歡迎。
用超過30種西班牙香料炒香靈芝菇、雞髀菇等多種菌類，惹味而不油膩爽口得嚟又香又辣。
沙律多屬冷盤，但係呢個沙律上枱時重係暖暖哋，而選料方面亦都頗為特別，除咗有日式燒三文魚之外重加入豆腐碎，所以都唔使擔心呢個沙律會唔夠飽肚。
呢個係Charmaine自創嘅Fusion菜式，鮮蝦底下嘅係一「餅」稍稍煎香嘅日式壽司飯，口感少少硬，不過加上少許沙律醬味道都唔錯。
地址：銅鑼灣糖街29號匯景商業中心17樓
電話：28826286
營業時間：星期一至六11:00am-9:00pm；星期日及公眾假期11:30am-6:00pm
套餐A收費：$188
水瑩美白護理全套、抗氧眼部/頸部護理、耳穴香薰棒、一款菜式
套餐B收費：$288
活細胞肌膚再生護理、抗氧眼部/頸部護理、全身按摩45分鐘、一款菜式
講到有得食又有得扮靚嘅地方，又點少得好多影視紅星出入嘅御用髮型屋HairCulture。雖然呢度最出名嘅係牛扒，今個星期菜單有魚有羊重有燒乳豬，用嘅係新派法國煮法。電個明星頭，食個新派法國菜，過個悠閒嘅下午。
喺意大利學廚二十年嘅大廚Tommy，同樓上一級髮型師們有個共通點：鍾意玩創意。「我哋每個零兩個禮拜又會想搞搞新意思，真正反應好嘅菜式先至會留低，所以餐牌上嘅菜式全部都係貼上去嘅，方便轉款。」
新派法國菜煮法，魔鬼魚配上澳洲番茄、新西蘭牛油果同欖油混成嘅沙沙汁香氣四溢。因為佢得一條主骨，一梳梳嘅魔鬼魚肉一拮就成塊甩出嚟，啖啖肉，口感滿分！
蔡瀾食過都讚好嘅新派法國菜，乳豬已經起晒骨，難得肉味清香一啲都唔Heavy。不過小記反而最愛Tommy最拿手嘅靚麵，咬落彈牙非常而且有陣濃濃嘅牛油味。
等人唔悶
Vivian：「一邊Set頭一邊食嘢，慳好多時間。如果陪朋友嚟整頭，我又唔會悶，可以喺Cafe飲嘢。」
地址：尖沙嘴亞士厘道9-11號G樓至2樓
電話：23178881
營業時間：星期一至六11:30am-2:00am
星期日及公眾假期1:00pm-:100am
