過幾日班香港富豪會空群而出上京，之前講過話北京方面好豪氣，講到明會包起成個行程，每位富豪重可以帶多位家人同行。有份上京嘅全國政協副主席霍英東，會帶一位神秘「嘉賓」去。
八方噚日喺中總國慶酒會，見到老霍同二仔霍震寰。霍公子早前打波扭傷腳，啱啱做完手術駁好斷咗嘅腳筋，噚日出席酒會都要着住一隻拖鞋襯一隻皮鞋，佢話到時好難上京，阿爸要搵個行得快啲、大力啲嘅人陪，幫吓手挽吓啲載有「機密」嘅行李。
至於呢位「大力啲」嘅人，唔係大公子霍震霆。霍老同八方揭盅，話係喺英國做醫生嘅仔，因為此行要佢照顧自己。
呢位霍公子叫霍顯旋，洋名Donald，可能平時太低調，霍震寰都講唔出佢喺家中排第幾，只係話「應該係弟弟」。記者問到霍老，都竟然話唔記得個仔幾多歲。據講，霍老「顯」字輩嘅仔，都係三太太所出，今次呢位霍醫生特登放低英國嘅工作，返香港陪阿爸上京，都算孝順仔一個。
（圖）霍震寰因為隻「痛腳」（箭嘴示），冇得跟阿爸上京朝聖。
傳真︰2623-9278
電郵︰