啱啱減咗十五公斤嘅大口仔香取慎吾，上兩個月忙於為佢擔正嘅首部真人版《忍者小靈精》電影趕工，前日呢套戲終於拍完，下年春天就會開畫。講真，我羅拉聽到唔少小靈精迷知道係香取扮佢哋偶像之後，對佢真係毀譽參半，因為香取話晒已經二十六歲超晒齡，而且佢出名大隻騾騾，至少「高過」小靈精四十厘米，點做到身輕如燕嘅小忍者先？
好在香取之前為咗出書瘦咗好多，我羅拉早排就有幸一睹佢喺八王子高尾山拍攝嘅情況，發覺佢打又得，搞笑又得，性格夠戇居，最重要係香取笑起上嚟，個嘴都有青蛙口小靈精一半咁大！香取話：「我知漫畫入面嘅小靈精成日擺烏龍，但我就想做得型啲，當然都會有啲位大家會笑到收唔到掣啦！」香取重不忘為所屬嘅組合SMAP宣傳，佢話：「始終小靈精都係madeinJapan（SMAP新大碟名字）嘅英雄嘛！」
另外我羅拉想提一提大家，咪淨係掛住香取同田中麗奈呢兩個角色，重有個好緊要嘅死對頭金麥基呀！今次電影版係由唔多識嘅搞笑組合Garejji成員Gori扮演金麥基，重要係小學老師，同原著差得重遠。