自從多蒙特喺歐冠盃外圍賽出局後，話隊波衰到𠵱家都唔過份。正當隊波準備響禮拜三歐洲足協盃作客奧地利維也納前，會方宣布同球員達成協議，每位球員減薪兩成，加埋隊波最近飽受傷兵問題困擾，屋漏兼逢連夜雨……，班球員要執生啦。
據講，多蒙特踢唔到歐冠盃分組賽後，坐底唔見咗一千二百萬歐元（約一億零六百萬港元），打亂晒會方嘅財政預算；而班球員好似患得患失，往後比賽表現麻麻，上個禮拜六輸埋畀史特加之後，有過百球迷迫住架球隊巴士，要求球員為踢得差道歉。
前日，全隊上下開咗三個鐘頭會議，大家傾掂數肯減薪兩成，作為踢唔到歐冠盃嘅自我懲罰。照咁睇班球員決心共度時艱，但齊心係咪代表跟住會順景？睇埋禮拜三至講。
可能着咗碧咸件七號衫，基斯坦奴成個「碧咸第二」；佢最近用三十萬鎊喺碧咸以前住開嘅柴郡買新屋，又幫襯碧咸買開嘢嘅店舖，再買碧咸至愛嘅寶馬車款，派頭十足。奉勸佢最緊要響球場上小心身體，話晒隊友蘇斯查膝頭哥將做手術要唞六個禮拜，基斯坦奴更加孭重飛。
喺AC鬱鬱不得志嘅李華度，擺明同教練安察洛堤唔妥，近日公開批評對方唔重用佢等於侮辱佢，而對方對佢態度好差，用佢嗰朝會同佢講早晨，唔用佢嘅話成個禮拜都唔同佢講嘢。其實李華度好波人所共知，不過靠把口無用，希望佢下次落場嘅時候做到嘢啦。
熱刺新領隊誰屬，有部份博彩公司就唔敢開盤，因佢哋話已有好多注碼準備押喺前巴塞隆拿教練安迪身上，懷疑係內幕票，所以決定唔開盤！又係嘅，塞黑籍嘅安迪喺球員時代效力過盧頓，當時盧頓領隊正係目前熱刺總監兼代領隊柏列特，兩個係老朋友關係，搵佢坐正都唔奇！
前世界重量級冠軍拳手般奴近日因為憂鬱症，入咗倫敦附近一間精神病院接受治療。據講呢位四十一歲英國拳手因為難以適應高掛拳套後嘅退休生活，加埋離婚嘅打擊，情緒好低落；不過我求驗客懷疑呢位退役已經差唔多八年嘅拳手，真係有憂鬱病，抑或係俾人打壞腦。