上個星期三嘅歐洲冠軍球會盃賽，阿仙奴主場對國際米蘭，阿仙奴輸咗零比三，相信外圍莊家、賭波公司，以及馬會都贏到笑，賽前預測普遍睇好阿仙奴，點諗到會輸得咁杰㗎。
阿仙奴年年踢歐聯比賽，都冇乜好結果。照計呢班球員嘅歐聯比賽經驗豐富，國際球星雲集，點解會咁水皮㗎？睇嚟係球員怕輸，心理負擔大，球隊戰術亦有錯誤。睇吓車路士點樣贏捷克布拉格史巴達隊就知嘞。
車路士球星如雲，粒粒皆星，但領隊雷阿里排出四個中場：華朗、謝列美、馬基列、比提，顯然注重防守，爭取中場，先求上半場不敗，睇清形勢，下半場就換入攻擊性中場球員杜夫、林柏特出場，果然小勝一比零，可見領隊幾咁小心應戰。相反，阿仙奴雖然後防不穩，但係打主場唔肯注重防守咁冇面，要搶攻，結果頭二十分鐘就畀國際米蘭突擊得米，玩完！
以後賭歐聯球賽，阿仙奴買唔過，車路士亦好難買，因為唔知車路士臨場排出一個乜嘢陣，用乜嘢戰術也。打完頭一輪，皇家馬德里攻力最強，先輸亦可反勝，朗拿度射術好犀利，有碧咸、施丹、費高餵波源源供應不絕，不愁冇波入，所以朗拿度話：「我哋後防失球唔緊要，最緊要嘅係我哋入波多過人哋！」不妨大膽預測，今年嘅冠軍，又係皇馬與祖雲達斯、AC米蘭之爭，英國球隊冇份！