新車速報：新裝備坐得舒服<br>豐田Alphard3.0MSPremium

新車速報：新裝備坐得舒服
豐田Alphard3.0MSPremium

豐田Alphard可算係城中炙手可熱嘅豪華CityMPV，而原廠更替其推出新裝備，正如呢部Alphard3.0MSPremium特別版，既有齊原廠包圍、Xenon頭燈，又有雙電趟門及高級AV裝置，加上新出半麖皮半絲絨座椅嘅軟滑貼服性，確實係唔錯嘅選擇㗎！

記者、攝影：李勤

包裝吸引又講究
新車前後裝有原廠包圍，既醒目又有型之餘，另外重有Xenon大燈連霧燈配搭，加埋尾定翼及四輪17吋合金胎軨組合，單係一身嘅裝扮，經已教人感受有一份豪邁見時尚美嘅新觀感呢！而車身兩旁雙電動趟門配搭，更為乘客上落車時，帶來不少方便呢！

■車廂陳設講究又見寬敞，好有一份豪邁嘅優越性。

■兩旁門邊電鏡連方向指揮燈，予人易看嘅安全度。

■尾泵把連整流設計，兩旁既有反光板，又內置泊車感應器，有十足安全感。

Premium版座椅貼服設備多
講到車廂三排八座位配搭，屬Premium特別版嘅半麖皮半絲絨椅組合，加上寬敞闊落嘅車廂空間，置身其中軟滑舒適之餘，車內重裝有前後AV系統，匹配響獨立前後恒溫冷氣連送風裝置，還有前後雙天窗、照明及車窗布簾配搭，既出眾又愜意㗎！

■頭泵把連大型氣霸，兩旁重附有霧燈組合，倍見惡形惡相嘅一面。

■原廠尾定翼連High-mount煞車燈，既安全又具點綴作用。

3.0V6偈可靠突出
新車沿用一台3.0公升V6偈，勝在低轉扭力高外，重有慳油嘅特性；而低重心穩紮嘅底盤設計，重予人行車平穩流暢嘅體驗，加埋四輪高效能碟式制動及ABS連EBD裝置，每有煞車需要時均感收放自如㖭！

■前後三排八座位設計，用上最新Premium獨有麖皮同軟滑絲絨料組合，乘坐妥貼又愜意

■左右雙電動趟門配搭，還備有獨立手枕及頭枕組合，給乘客倍感舒適性。

■中排椅背各置有活動桌几之外，還可作大型餐桌用。

■大型一體式中控台，既有高級音響連AV裝置，又有原廠前後獨立恒溫冷氣。

■大型雙層首飾箱裝置，好切合MPV需要。

■車身前後加有泊車感應器，靠近障礙物時重有人聲提示。

■前排之間嘅大型雜物櫃有摺叠桌几面，可盛放多個遙控器及原廠免提式電話。

■前後AV系統連特大屏幕，可給乘客有至高娛樂享受。

■有齊前後雙天窗，重備有獨立送風同照明裝置，還有車窗布簾配搭，既講究又實用。

記者話：坐落好舒服呀！
呢部豐田Alphard3.0MSPremium不但加有全車包圍，令賣相突出吸引之餘，車廂空間又見寬敞闊落，而全新半麖皮半絲絨座椅配搭，乘坐感明顯較前來得更佳；而一台3.0公升V6偈，又見有慳油好力嘅特性呢！

豐田Alphard3.0MSPremium小檔案
引擎：2994ccV6DOHC
馬力：220ps/5800rpm
扭力：31.0kgm/4400rpm
尺碼：4845×1830×1935mm
軸距：2900mm；車重：1850kg起
新車售價：$409,000起
車輛提供：歐日汽車（26201010）

■新車沿用一台3.0公升V6偈，勝在扭力強悍又慳油，匹配上4前速自動波，操作駕輕就熟。