好多明星都好信泰國嘅白龍王，好似梁朝偉、林建岳、王晶同舒淇，對白龍王奉若神靈，連劇本、戲名同埋部戲幾時上映都交畀白龍王決定，聽講白龍王好錫偉仔，而早排偉仔就去咗珠寶行，買咗一對金鑽勞力士送畀佢，呢對表總值四十幾萬，嘩！偉仔都幾大方喎。
舒淇日前喺泰國拜完白龍王，畀咗《見鬼2》個劇本佢祈福之後，噚日又搵人喺香港買雪茄帶去泰國送畀白龍王。馮仁昭有時都覺得圈中人幾搞笑，乜都聽晒白龍王話。唉！想部戲收得，不如畀心機提高部戲嘅水準好過，杜琪峯冇信白龍王，又唔見佢啲戲唔賣座？過於迷信始終係唔係幾好嘅。
佘詩曼噚日喺將軍澳電視廣播城，佢睇到報道話張栢芝喺內地演出時俾人胸襲大感驚訝，佢話自己都有過類似經歷，重俾人掂到重要部位，阿佘話：「不過對方係女仔嚟，着住條裙重俾人扯低咗，好彩有着定打底褲，我嘅預防方法係鬆踭嚟防止陌生人埋身。」馮仁昭覺得阿佘每次活動帶定一班「觀音兵」做貼身保安，咁就萬無一失啦。
張學友日前接受有線娛樂新聞台嘅訪問，吳君如好有興趣要知道學友嘅性生活，學友即刻話睬君如都儍，大耍太極。反而學友一講到佢個寶貝女就顯得眉飛色舞，佢話平時唔係好畀個女睇電視，因為驚佢分析能力唔夠，怕電視會對囡囡造成不良影響。馮仁昭都好認同學友嘅講法，所以時下藝人好應該生活檢點啲。
無綫劇集黃金時段收視每況愈下，由郭可盈同譚耀文合演嘅《俗世情真》上星期推出，收視只得二十五點，約一百六十二萬觀眾，另一套由一眾後起之輩同埋楊思琦擔演嘅《英雄、刀、少年》得出同樣收視，似乎冇乜睇頭，但可盈噚日死撐話：「冇失望，因為題材好有意義，比較另類，收視低少少都唔緊要。」
徐若瑄噚日喺台灣嘅行天宮拜神，當時佢拎住香，好似普通巿民咁好神心參拜。馮仁昭覺得徐若瑄咁誠心，唔知係咪想求神等感情可以早日開花結果，唔使再向傳媒解釋身邊唔停咁傳嘅緋聞呢？
