唔知大家重記唔記得早幾年有隊丹麥組合叫Aqua？佢哋嗰陣靠首兒歌咁款嘅《BarbieGirl》食胡，播到連大人細路都識唱，不過之後Aqua已經冇大作為，搞到解散埋都冇人理。
不過人始終要食飯，Aqua個女主音Lene喺組合散band之後，惟有另謀出路，最近佢終於閉關完畢，以個人歌手姿態再戰樂壇，好明顯Lene知道自己唔可以再好似以前喺Aqua嗰陣時咁扮儍妹。
為咗要增加新碟《PlayWithMe》嘅聲勢，Lene都要學人行性感，我大口羅拉身經百戰，但睇到佢個新MV時都有啲眼凸，真係估唔到Lene晒起身材上嚟，原來可以咁勁嘅。
影新碟宣傳相時已經以比堅尼上陣狂騷雙胸嘅Lene，喺新歌《It'syourduty》MV入面更加勁玩百變性感形象，一時着緊身皮衣拿住條鞭同男對手互相愛撫，一時又成個SM女王咁自摸，又扮性感OL喺辦公室勾引男人。
不過最抵死都係佢扮鹹濕俏護士，幫赤裸男病人按摩之餘，重大膽揭開病人塊毛巾狂昅人哋重要部位，佢個假到唔恨嘅驚訝表情，真係笑到我眼淚都出埋。