喺倫敦做工嘅比提小姐對校友重提到：「英國人好反對政府發身份證，最近工黨政府曾有發身份證建議，因太多人反對，現已擱下不提，既然冇身份證，英國人做生意，極端注重你嘅住址，譬如你想買個手機，成為O2、Orange每月用戶，對唔住噃，如果你證明唔到你嘅住址，銷售商唔會做你生意。我有一個朋友自香港來倫敦，租樓用公司名，公司交晒房租水電煤氣。佢想去『百仕達』租DVD、影帶，於是申請入會，點知『百仕達』唔畀喎，理由係佢提供唔到居住證明。朋友拎晒電費單去，百仕達話：對唔住，電費單係你間公司嘅，唔係你嘅。朋友為之氣結，之後去申請手機，又碰上同樣麻煩，申請大百貨公司VＩP卡亦係一樣。最後佢用銀行月結單為住址憑證，先至可以搞掂。」
正是一處鄉村一處例，去到倫敦讀書、做工，最緊要搵到一個地址先，然後申請入屋電話、寬頻、電視牌照，否則生活好唔方便。電視牌照費約一百鎊一年，想落好荒謬，究竟英國人係唔係咁老實，人人都肯去郵局申領、繳交電視牌照費？當然唔信啦，買個電視返屋企，點偵查呀？如果警察要入門拉人，咁就唔使慌有時間去捉賊咯。據講英國喺十七世紀（記憶可能有誤）時曾經收過「窗口稅」，樓房開窗就要交窗口稅，所以當時好多人打爛窗門，後來國會議員要求取消此稅，話此稅簡直係daylightrobbery，於是英語就多咗呢個詞語！