SARS去又來，面對疫症的威脅，最好是做甚麼？就是去食大餐。中醫說食療可養生，西醫說充足的營養可增強抵抗力。以下呢四位師傅，就跟你來個真人示範，分別以中西兩個角度，煮出一系列抗炎大餐，讓你「擦」飽，順便整埋個肺。
記者：朱崇德、李敏怡
攝影：星辰、梁細權、陳陶鈞
Model：Yuko（Stage2）、Joanna、Cathy（Sunspot）
「從中醫藥理角度，面對SARS的侵襲，最佳預防方法就係增強自己嘅抵抗力；西方藥理都差唔多，所謂預防勝於治療嘛！」中環蘭桂坊CaliforniaRestaurant嘅集團行政總廚JasonHyatt，自述曾經在孩提時在美國患過肺炎，雖然冇SARS咁「攞命」，不過一樣叫佢死去活來！
「8歲時曾經患過肺炎，在膠氧氣箱內一住就是個多月，完全與世隔絕，吸每口氣都叫我痛不欲生，所以我都好明香港患SARS人士的苦況！」「重記得病後返到屋企第一樣見到嘅，就係老媽子所煮嘅熱雞湯麵條，放入嘴真係有一種好Fresh感覺，而且裏面菜蔬、肉類、碳水化合物，種種飲食金字塔中最主要成份無所不包，所謂均衡飲食先至係令人體格健康嘅基本，有時真不得不佩服老人家智慧，所以我今次嘅防SARS菜式，都係從呢個均衡着手！」
CaliforinaRestraurant
電話：25211345
地址：香港中環德己立街30-32號加洲大廈地下
營業時間：
星期一至六12:00nn-零晨；
星期日6:00pm-零晨
Yuko：靚仔廚司Jason教我，外國人朝早起身一定飲杯金巴利汁溝橙汁，佢好似中國人嘅五花茶一樣，據說有清腸胃同調節身體機能作用，加埋兩種生果都有豐富維他命C，𠵱家已經到咗流感高峯期，多飲對身體有益。
美國入口雞隻脂肪含量較本地雞隻少，去皮後用慢火熬製，味濃恍如中國人嘅清燉雞湯，口味又夠健康；其他配料包括有含豐富維他命及礦物質嘅紅蘿蔔、芹菜、青葱、洋葱等，加埋千里香同意大利芫荽等香料，帶出菜蔬同雞肉香味，有口感有層次變化；不過最過癮係麵底，使用歐陸風味的扁身麵條，長時間浸泡在熱湯內，都一樣好有彈性。
用料係挪威一級三文魚，據稱內裏的天然油份，對心臟及人體內臟有滋潤作用，伴菜是傳統口味嘅薯仔沙律，加橙汁及檸汁，維他命絕對豐富；特別推介係青綠的鮮蘆笋，唔係太大，脆口又鮮嫩。
自SARS之後，好多香港人都開始逐漸意識到，不過Munch嘅行政總裁Kent，早在十多年前已經行先一步意識到，而且重開始只進食有機栽種的食物。
「基本喺度食到嘅所有菜蔬，以至最基本嘅五榖食品，都全部用有機方法栽種，健康新鮮，又不含農藥、防腐劑等化學成份。食一餐半餐嘅有機食物，好難睇出身體上嘅變化，就以我哋公司嘅員工為例，佢哋每日的福食，我都一樣堅持用有機食品，佢哋好多都話改變了飲食習慣後，明顯人變得精神咗，而且做工作冇咁易累，身體病痛都少咗，呢個就係身體機能均衡後的功效。」
Munch
電話：23177887
地址：九龍尖沙嘴漢口道19-21號漢宜大廈L及M舖地下
營業時間：11:00am-1:00am
用麵粉嚟做蛋糕，就係人都知，但加入埋有機小米嚟做，又真係幾新奇，麵粉嘅芬香，再配以小米一種腍腍嘅似曾熟識嘅味道，好有特色，調味是用甘笋加香橙汁所打成嘅餡料，加強佢嘅鮮味口感；提醒一眾男士們，Kent話：「有機小米對男性嚟講，有過濾、排毒及調節身體機能功效，多食對身體有益。」
低脂嘅白肉，加埋有吸收人體腸臟內多餘油脂嘅小麥胚，對身體梗係有益啦！汁料是特多維他命嘅甘笋汁、去除魚腥味嘅薑汁同加強香味嘅鮮牛油，健康與美味混為一體，邊個重敢話食有機食物一定味寡。
這裏有一款非常獨特的姬松菌，據稱是有加強人體免疫能力；製法好簡單，拌以雜菜及幼麥麵，以小量有機橄欖油炒成，功夫之所繫是要用少油及控制火路，唔可以受太耐火令菜蔬的維他命流失！但煮得太「青」又失口感。
久聞呢度嘅中菜部行政總廚黃文杰師傅甚懂養生之道，是行內數一數二身材最Fit的人物，今日有幸拜會，果然，眼前的他不但沒有廚師肚腩，而且臉色紅潤光澤，步伐輕盈如飛。黃師傅話十多年前，佢當時嘅老闆規定每人每日要食六両蔬菜，重要一日一個橙，久而久之，成為佢嘅習慣。𠵱家佢每日都會用一個檸檬榨汁飲，佢話可以殺菌，更可幫助消化。十多年來，師傅不但身體Keep得Fit，而且抵抗力重好好，重好少會感冒㖭。黃師傅研製了數款時令潤肺菜式與湯水，想食客與他一樣健健康康。
帝苑軒
地址：尖沙嘴東部麼地道69號
電話：27242666
營業時間：
11:30am-3:00pm；6:00pm-11:00pm（星期一至六）
10:00am-3:00pm；6:00pm-11:00pm（星期日及公眾假期）
唔好以為係炒蜆同鴨胸，其實係一種名叫蜆鴨嘅水鴨，肉質彈牙香滑。師傅話炒鮮人參都頗考功夫，火候要掌握得好，否則便會太嚡。
功效：陳裕欣醫師話人參能寧神益智、健脾益氣，能加強肺部功能。至於，蜆鴨胸則能化痰理氣。
用冰鮮的鱷魚肉，切片拖油，再與龍脷葉、南瓜一起炒至熟透。鱷魚肉肉質鮮甜彈牙，南瓜則爽口清甜。
功效：陳醫師說鱷魚肉能消積解毒，可逐痰止咳。而南瓜則清心火，龍脷葉潤肺化痰。
這個湯足足燉了六個小時，用料全是名貴的川貝與鱷魚肉，大人細路有幾聲咳，傷風感冒，瞓得唔好就至啱。
功效：陳醫師說川貝能鎮咳化痰，加上能增強抵抗力的鱷魚肉，是一個非常補身的湯水。
師傅說炒珍珠蚌最講究時間嘅掌握，炒七成熟，上枱時便剛剛熟透，恰到好處，爽口不韌。
功效：馬蹄清心火潤肺，鮮百合健脾補肺，而珍珠蚌則清甜可口，養顏佳品。
洗豬肺是最考功夫和心機的程序，要慢慢用水把內藏的血迹逼出來，足足需要兩至三個小時。奶白色的湯水，清甜可口，大人細路都咁啱。
功效：豬肺能清熱潤喉，收補肺功效，老少皆宜。
「考察最難忘嘅係一日食至少四餐藥膳。」粵菜部副總廚黃振勝說。
今年六至八月，呢位黃師傅同一班同事北上考察，試遍華東一帶的藥膳，回到香港後，便推出了這系列的藥膳點心同小菜。師傳話用中藥來做點心最高難度係份量要掌握得好準。「想食客食得健康，所以便將中藥加入點心中，但控制份量好考功夫，否則便會呈苦味，所以每樣點心大大話都試咗十次、八次至成功。」他說。
全線美心粵菜酒樓
點心價錢：頂點$26-$39；大點$18-$29；中點$15-$24；小點$11-$17
供應日期：9月25日至11月30日
師傅說紫貝天葵乃鼎湖山的特產，加上山渣及鮮奶，便可製成這道甜點，入口香滑可口。
功效：陳醫師說紫貝天葵能清熱解毒，化痰益肺。
湯餃一向都是點心類的「貴價」菜，呢道魚翅湯餃就更加矜貴，用了天麻、人參、等十多種藥材熬湯三個小時，可謂足料足功夫。
功效：益氣壯肺，開胃增食。
用了江南珍珠糯米，米粒圓潤，口感較常用的泰國糯米較軟身，再加上冬蟲草、杞子、當歸等藥材，入口甘甜並不膩。
功效：陳醫師說杞子能補肝腎，提高肺功能；而當歸則可補血活血，強健體魄。
$1,188一份（十二位用）
至於晚市的佛跳牆，用料既多且名貴，有鮑魚、海參、花膠、瑤柱等，藥材則有西洋參、黨參、當歸、何首烏等十多種，燉四個小時才完工，實為補肺最高境界。
功效：陳醫師說西洋參能養陰清熱，生津壯肺。此外，這道佛跳牆更可補腎益精、補氣活血，總之同你打好個底，增強你嘅抵抗力。
家庭醫生關嘉美醫生表示，其實均衡嘅飲食習慣，的確係可以加強人體嘅免疫能力，「其實每一種維他命都好重要，𠵱家有啲人誤以為維他命C對身體好，就猛咁食橙，變成一種偏食嘅習慣，可能會適得其反！」
其實一個人基本嘅食物需要，大概是由50%碳水化合物、30%脂肪同20%蛋白質所組成；所謂平有平食、貴有貴食，如果唔想太花費出街，但又要達致均衡均飲食目標，建議可試行以下的「1-6口訣」：「每日飲食習慣要有：1杯牛奶、2個生果、3碗飯、4両肉、5-8両菜及6-8杯水。」
