自從碧咸兄加入皇馬，無日不為他擔心，論好波他不是最好波，身價比他高的亦大有人在，如此花俏的翩翩美男，在雄赳赳的群壯當中，能否突圍而出。
球季終於開鑼，皇馬無論在聯賽或歐冠盃中都有驕人演出，碧咸兄更是大顯神威，不只在球場上，在球場外更見其威力。首先，因為有碧咸兄的粉墨登場，平時只有齋仔的睇波酒吧中，出現了群鶯亂舞的動人場面，其中不乏相貌娟好的美少女，令一眾豪邁波牛男球迷平添一份旖旎，大家基本上望女球迷多過望投射大電視。另外，普遍球迷，如果投注買波，一律清一色買皇馬贏。
幸好，碧咸兄亦真有過人之處，逐漸在球隊中顯出其存在價值，由他校炮斬出的波，真箇是妙到毫顛，球球落在魯爾、費高、朗拿度、卡洛斯與施丹的腳前，五條煙只需舒舒服服起腳抽射，皮球便應聲破網，碧咸兄亦戒掉了以往在曼聯隊中一有波到腳便擒擒六傳波的陋習，現在起碼肯帶波、追波、盤波及𦧲波，冇咁錫身自然好睇得多。
碧咸兄恍如完美化身，無懈可擊，所以每次聽到碧咸兄開聲便開心好多，如此俊俏面孔竟然配給一把雞仔聲，上天確然公平，咁樣條氣都順番啲。