「為煮醬汁，絞盡腦汁」是Winsy及Zoie對下廚的最大體會。在她們眼中，醬汁便是一道菜式的靈魂，一條魚、一些雜菜，主體沒變，但只要配上不同的汁料，效果便完全不一樣，所以普通如白汁意粉也堅持要自己煮白汁。
記者：吳佩璇
攝影：伍慶泉
就讀中七的Winsy及Zoie，自中三以後沒有了家政課，便一直都好懷念下廚，所以耐不耐就會約埋成班同學玩煮飯仔。其中Winsy和Zoie，是同學中最愛整色整水整醬汁的。在剛過去的暑假，更一星期煮足兩、三日。新學年開始後，還將一味白汁帶回校園發揚光大呢！
愛鑽研醬汁的調配，原因簡單不過，只因她們認為醬汁可為菜式起點睛作用，令平凡的菜式變得更有層次，為單調的味道帶來新意。Winsy話：「好似泰菜、印度菜咁，好多時都係靠個汁。就算係中菜蒸條魚，都可以有豉椒、香蒜，憑個汁料起好大變化。」為了增加烹調靈感，Winsy及Zoie最愛蒲學校「拉記」（Library），借閱各類CookBook參考，都算是勤力的好學生！
鍾意煮的人，大部份亦都愛吃。Winsy同Zoie愛吃意粉，經常幫襯山頂某西餐廳，而該餐廳是用開放式廚房。一次，她們見廚師煮白汁意粉，便目不轉睛地偷師。Winsy憶說：「以前都係開罐頭，唔知煮白汁原來要落忌廉及白酒，返屋企就試吓整。試咗幾次，終於成功，有酒香又有忌廉香，更加Creamy同Juicy，罐頭白汁簡直無得比！」
用咩料：
蘑菇8粒、雞柳2條、意粉2/5包
醬汁：忌廉1盒（250毫升）；白酒2湯匙；胡椒粉、鹽、牛油、香料及芝士粉各少許
龍脷柳亦是Winsy與Zoie的至愛食物。從前她們多數把龍脷煎香便吃，沒再加其他工夫。但自白汁受到同學間廣泛認同後，她們便想到為齋煎寡口的龍脷加點醬汁。Zoie直覺龍脷宜配酸甜而Light一點的汁料，又從學校圖書館借來烹飪書，看到有用橙來做的汁。她便試着用橙加芒果來做汁，但芒果煮來太爛，感覺又濕熱，後來改用檸檬，效果不錯。
用咩料：
龍脷柳1-2塊
醬汁：橙及檸檬各1/2個、鮮忌廉5湯匙、蛋黃2隻、白酒125毫升、牛油2安士
