七一遊行之後，本地嘅土共，心理好受壓抑，激到咬牙切齒，好多人都知，不過若然唔係邵善波喺「二十一世紀香港管治論壇」上典床典蓆嘅表演，香港人都唔知有一批死硬土共，對香港人嘅仇恨原來係咁深。
邵善波極力反對二○○七年直選特首，話香港未夠「配套」，意思是指傳媒唔夠聽話，報道帶埋意見嘅導向，公務員又抵制緊老董。七一遊行係傳媒策動？阿董嗰邊夠有《大公》、《文匯》、《商報》三大喉舌，日日吹捧老董，就算係兩邊鬥吹雞，左手邊吹唔贏，咁就話配套唔夠？咁車路士隊對狼隊，狼隊輸咗五比○，唔通狼隊又賴球場配套啲草地唔靚？
至於公務員嗰瓣，邵善波就更加失憶。陳太走咗已經兩年，𠵱家呢個班底，係老董連任嗰陣時自吹為有新思維嘅新團隊。以前就賴陳太阻住老董前進，𠵱家索性賴晒全體公務員唔合作，光頭波唔通講出咗老董唔敢講嘅心底說話？
邵善波唔知係咪冇得入行政會議，所以發晒茅。不過，就算三生有幸，俾老董欽點入咗權力中心咁又點吖。做過老董智囊嘅葉國華，喺同一個論壇，以一種怨婦嘅口脗，大罵老董唔肯接納正確意見。連國師都做到一肚火，就算邵善波埋到老董身，老董聽咗佢嗰籠，香港嘅經濟同政治，睇怕都會好似邵善波個頭殼頂咁，永遠都寸草不生嘞。
不過邵善波噚日一輪發洩，出席論壇嘅好多人，事後都頻呼慶幸，猛嗌好彩行政會議改組，阿董寧揀咗周梁，都唔揀邵善波入局，話老人家始終都懵盲唔得晒喎，見到邵善波咁嘅嘴臉，直頭覺得路祥安、林瑞麟等幾個，可愛咗好多。
咁又