早排睇報紙訪問，樂仔同讀者講佢嘅潮流之選，原來又係日本牌子「拉靶酷」。「大隻標」屬潮界新晉金牌經紀人，無論潮界、娛界、飲食界（甚至「魔界」）都稔熟。聽佢講呢個牌子來自日本原宿，已屹立多年，唔算最紅，但其實最有料。着親佢嘅人都係識嘢之士。咁即係話樂仔好識着衫乎？「大隻標」答：「非也。只不過係佢背後有人識揀衫啫。唔講你唔知，樂仔嘅『拉靶酷』全部喺一間位於銅鑼灣商場嘅水貨店買。不過每次都唔係由樂仔親自去買，而係由阿G幫佢入貨。阿G重好細心，每次買親都係買加大碼，彷彿非常清楚樂仔嘅Size。試過有一排，所有由呢間水貨舖返嘅加大碼『拉靶酷』，都會被阿G掃晒畀樂仔，搞到我落親去都買唔到。你知我啦，我身形大隻過樂仔㗎！不過呢啲都係早排嘅事，近排啲加大碼『拉靶酷』又湧現番喇。」最後「大隻標」仍唔肯透露呢間水貨舖嘅確實位置，淨係透露：「呢！就係黃玉郎同馬Sir都去幫襯嗰間水貨舖囉！」
文：大食Jack