上星期經紀陳懶神秘咁同小初推介上海銘源(233),公司上周邀請證券界及傳媒北上後,噚日終於發難,最高見過0.53元,收0.49元,升12.64%,成交急增至2000萬元。
真係估唔到隻股要事隔一個星期先至開車,小初因為等得唔耐煩,加上近日市況麻麻,所以一早就走咗,家陣升咗咁多,當然唔想高追。
小初打電話畀經紀陳,叫佢講貼士timing要準,唔好太早亦唔好太遲,經紀陳聽完之後即刻反面,幾乎要同小初絕交咁滯,小初唯有認錯講sorry。
不過,經紀陳噚日已經下火,推介宜進利(304)。隻股早幾月前炒得好勁,呢一排比較靜,但最近好似又有新搞作,同部份證券行傾緊搞批股。
宜進利股價近排一直在0.80-0.90元徘徊,成交亦冇先排咁勁。不過,公司業績算ok,大股東早前選擇以股代息,算係對公司投下信心一票,加上同幕後炒家合拍,如果公司真係想配股,估計應該搞得成。
慕容小初