合和集團主席胡應湘呢排好旺場，經常出席公開活動，噚日就喺兩岸青年企業家論壇午宴作主講嘉賓。佢當然不忘推銷港珠澳大橋嘅好處，又加一句，話如果能降低本港的碼頭處理費就更好，可以吸引更多貨流來港，因此佢建議本港應興建新嘅貨櫃碼頭，以打破目前本港碼頭經營業務「半壟斷」情況。
聽完胡主席呢句良心說話，八方追問佢老人家，𠵱家邊個壟斷香港碼頭業呢？當然，佢點都唔肯講明，但唔講大家都明。
傍晚八方在香港潮屬各界慶祝國慶酒會上見到長和系主席李嘉誠，李超人亦係碼頭中人，可能佢會有答案，可惜誠哥第一句就話「對唔住，我今日唔講嘢」，令八方問都冇得問。
講番胡老，佢話起好港澳大橋後，可以拓展粵西的廉價勞動市場，有助遏止廠家自成本日漸昂貴的粵東遷移至越南、孟加拉，如果係咁，珠三角服務嘅不但係華南地區，甚至可遠至東盟十國。咁講，香港發展嘅空間其實好大，大家畀心機啦！
另外，胡應湘噚日上晝出席一個大學論壇時，話如果當年唔係去泰國同印尼投資，就唔使損失慘重，𠵱家公司嘅資產至少多一百億元，「我可以早幾年退休！」
（圖）胡應湘（左）噚日出席兩岸青年企業家論壇午宴作主講嘉賓。
傳真︰2623-9278
電郵︰