面聖大過天,呢股風氣終於吹到傳媒界,由報業公會李祖澤帶隊嘅香港傳媒高層代表團抵京,廣播處處長朱培慶、無綫RayWong、亞記關偉、有線趙應春等都有捧場,當然獨欠唔受北大人歡迎嘅壹傳媒黎老細。
成班老細噚日見過陳佐洱,今日再拜訪北京市長王岐山、商務部,聽日入人民大會堂見埋中央政治局常委李長春,同埋國務院新聞辦主任趙啟正。究竟啲老細咁大堆頭所為何事?李祖澤話係為咗一啲傳媒界「共同關心」嘅問題。乜問題?唔會係向香港傳媒開放市場,畀香港報紙北上「自由行」發行啩?
咁會唔會提到23條立法呢?李祖澤話傳媒係關心23條,不過港人意見已經充份表達,所以唔會再傾;而佢哋當然都關心新聞自由,但據說《基本法》已經保障咗,所以都冇乜好講。咁重有乜好傾呢?原來係睇吓講到㷫烚烚嘅CEPA之下,傳媒有乜好處、有乜商機,順手同各部門建立「友誼」喎!
噚晚佢哋見完陳佐洱,李祖澤出嚟就話,有團員問阿佐洱,曾慶紅前幾日話有工作需要可以見民主派係乜意思?佐洱就話,曾副主席說話已經好完整,重叫班傳媒老細返香港問吓嗰啲高調話希望上京嘅人,究竟持乜嘢立場嚟。
傳真︰2623-9278
電郵︰