胡國興被老董委以重任，再做多三年選管會主席。佢噚日公布新一屆區議會選舉嘅規則，之後同八方講，話從來冇諗過唔做，因為呢個工作數佢最熟悉，可以改善選舉制度，咁有挑戰就梗係做得開心啦。
胡官肯再捱三年義氣，林瑞麟最高興，雖然話港式選舉一向較台式文明，但係明年立法會選舉始終惹人關注，搵個壓得住場嘅人梗好啲。
胡官回歸前已經負責搞呢啲選區劃界，呢樣嘢永遠會得罪部份人。原來胡官俾肥彭睇中有段古，話說肥彭當年想喺司法部搵人負責選舉，班法官坐埋一齊傾偈，有人擔心太政治化，怕會影響法官嘅獨立形象，點知胡官多口話應該唔會有問題，依法辦事，唔理政治就得囉。結果此番高見一出口，肥彭覺得啱聽，就做到今時今日。對法官嚟講，成日喺法庭聽審都幾悶，同政客交吓鋒一定過癮啲。
（圖）胡國興冧莊做多三年選管會主席，仍然樂此不疲。
傳真︰2623-9278
電郵︰