唔知係咪因為東涌近住赤鱲角機場嘅關係，區內嘅私人屋苑，通常都就地取材，以度假feel包裝。
好似香港興業嘅藍天海岸，八萬方呎嘅會所，就快啟用，有成四十幾項康樂設施，有動有靜，貫徹東涌區嘅悠閒度假感覺。
個會所未開放畀住客使用之前，就畀咗今屆港姐做活動場地，環境應該唔差。淨係個大堂樓底有成三十呎高，配上天幕式玻璃窗，與戶外嘅七十米園林泳池連成一體。重有螢光保齡球場、室內泳池同運動場，選擇多籮籮。
咪以為咁多設施，會係「羊毛出自羊身上」，屋苑每呎管理費一個五亳半，比隔籬嘅映灣園同海堤灣畔，每呎分別收一個七亳半同埋個六，重平少少。
北京市政府近年好努力，要將北京中關村改變成中國矽谷，嗰度嘅發展可謂一日千里，商業社區逐漸形成；有見及此，美聯中國日前喺度開咗第一間分行，發展北京西北部商舖同寫字樓市場。美聯北京區域副總張丹彤（圖四右二）話，之前非典影響公司嘅擴充大計，𠵱家就全速前進，會喺當地每季開一間舖。
噚日公開內購嘅鴨脷洲深灣軒，首名買家並唔係原區居民，而係九龍區又一村住客，買入單位呎價高逾四千六百，較發展商公布嘅四千二百，高9.5%。
據促成呢宗成交嘅香港置業姚錦凌講，該名買家購入深灣軒二座高層H室，面積七百八十二呎，有海景，成交價三百六十萬，每呎四千六百零四，買家睇完深灣軒現樓後，即拍板入貨！
樓市轉旺，經紀顧住爭客開單，做老闆嘅就爭先報喜，噚日喺美聯總部嘅記者會，老闆黃建業突然踩場，透露今個月嘅生意額係98年以嚟嘅新高，預計生意可以過億，比去年每月平均多近五成。
美記旗下嘅香港置業執行董事陳坤興話，今個月大豐收，9月份佣金收入係俾美聯收購以嚟最高，比上個月同期多一倍半。
另外，利嘉閣就有五間分行佣金突破百萬元，執董廖偉強重話，有信心今個月可以做到四千萬元生意。至於中原成績都相當好，今個月已經有十六間分行佣金收入突破一百萬。
蘭西
電郵地址：
