消費BestBuy：
玩電視角子老虎機嬴假錢都興奮

七千多萬六合彩一票中，奈何中獎者唔係你同我。返到屋企惟有玩呢部拉角子老虎機。
以前以為老虎機係無聊玩意，尤其中獎而跌出來嘅係代幣、假錢幣。但當筆者親身試玩過後，又發覺看似無聊透頂嘅遊戲，原來投入玩後會非常過癮，不少電視遊戲機都可以令人興奮忘形，而且放喺屋企隨時插掣就玩得，簡單易用，屬於家中解悶救星！
記者：張銘恩
攝影：陳盛臣
模特兒：May、Florian（RichStrategy）

電視老虎機玩跌錢
外形就如一部Cute版角子機，除咗有大家熟悉嘅角子老虎機遊戲外，機仔細細同時內置另外10個不同種類嘅遊戲，例如俄羅斯輪盤、棒球大聯盟、波子機、射擊等，其中一個較特別嘅就係相中嘅推硬幣遊戲，入啱角度就會有銀仔跌出，十足去咗乜乜天地咁，好搞笑。而每玩一個Game都要先入代幣，所以幾有街機Feel，若然你贏的話代幣會由機底跌出，嗰下確會帶來不少歡樂。

價錢：$630(原價：$699)(a)
難度：★★－★★★★（視乎所選遊戲而定）
玩後感：夠新意，遊戲方面亦非常多元化，可惜部機唔多夠手感，Size大啲會好啲。

內置乜遊戲？
放飛彈射海盜，啲海盜行得時快時慢，不過呢樣唔算難，最高難度係飛彈會循拋物線射出，所以玩時要將此因素計算在內。

應急財務都係搵佢

像真刺激氣墊球
十足小型版嘅氣墊球，將畫面中嘅氣墊球推入對方龍門謂之贏，真實感非常高，可以雙打或單打，速度好快，話咁易被對手射入咗都唔知。而且共有三種遊戲選擇，有考反應亦有考智慧，兩嚿水唔使，屬超值推介。
價錢：$198.8（b）
難度：★★★★
玩後感：氣墊球好似落咗場玩咁真！而玩草地滾球又要用腦，咁嘅價錢滿足到咁多要求，買硬！

Rock友至愛打鼓機
終於等到佢由街機發展到家用電視遊戲機，不過暫時玩法比街機簡單得多，畫面頂會有圓形物體跌落，只要趁之到達鼓頂時立即擊鼓，就可將之彈起，不然圓形物體墜落就算輸。此遊戲亦可單打或雙打。
價錢：$540（原價：$599）（a）
難度：★★1/2
玩後感：太易掌握，適合小朋友練習反應。建議成人不妨嘗試自創舞步配合增加難度，可玩性應該會大大提高。

扮晒嘢小提琴家
Size只係比真實小提琴細一點點嘅小提琴電視遊戲，外形殺晒。玩法其實係考大家嘅反應及拍子感，音符會不斷隨旋律而掠過畫面，大家需要等音符到特定位置，然後對準拉出，適當音韻就會出現。當然若玩者熟悉樂章會較容易掌握，但若從未聽過的話其實問題亦不大。
價錢：$774（原價：$860）（a）
難度：★★★★1/2
玩後感：好難跟啱拍子，需要多加練習，挑戰性大。

售賣點
（a）JCShop（31022783）
銅鑼灣時代廣場8樓833號舖

（b）玩具反斗城（28811728）
銅鑼灣皇室大廈三樓