美元轉弱，對港長遠經濟影響有利有弊、可大可小，但對短期股市就不利，日股噚日就大跌逾400點，港股受拖累，亦一度大跌145點，收市10873，跌95點，成交110億元，期指收報10843，跌150點，低水30點。
大市噚日再度下跌，恒指20日線（10957）應聲而破，走勢已明顯轉壞，下一個支持位係上周低位10762。
逆市上升股（不計認股證）仍有160多隻，受惠自由行的消費股繼續有追捧，卓悅控股（653）報佳績，升幅最大，高收2.075元，升8%，周生生（116）同六福（590）呢兩隻珠寶股分別進帳6.7%及5%。恒豐金業（870）收1.6元，只升2仙，主要係早輪做披成嘅貨要消化，恒豐金中線仍可看好。
Tom.com（8001）收2.40元，屹立不倒，有基金大盤買住，聽聞呢個禮拜會有大動作，股價有機會向3.00元推進。
Tom呢輪好積極，現時進行中嘅大動作就有兩單，相信落實嘅機會好大，好快會有宣布。
第一單，Tom正同主要股東傾緊，收購佢全資擁有嘅雷霆無極權益。
雷霆無極去年7月成立，並在10月率先在內地9省推出無線音訊服務，到今年5月將業務推廣至全國。過去幾個月，雷霆無極業務增長迅速，7月份的收入已達700萬元人民幣，據國家信產部的數據，相關的市場規模每年可達25億元人民幣，目前已開發的市場僅佔2%，未來發展空間極為龐大。
有消息指出，𠵱家傾緊嘅作價好「筍」，對Tom仔好有利。
第二單，Tom仔正研究分拆互聯網業務，消息亦話好快會落實。由於內地網站大翻身，重獲投資者青睞，所以，基金界對Tom仔今次分拆好重視。
據芬佬講，Tom旗下嘅互聯網業務好值錢，分拆後市值會好可觀，Tom股價亦會水漲船高。分拆涉及的資產包括短訊服務（SMS）、多媒體訊息服務（MMS）同網上廣告業務。
睇番Tom張走勢圖，由5月底開始，形成一個大圓底，阻力在2.6元，一升破，升浪即可確認，可追入，上升目標為3.2元。
郭兆誠